Katkam ka khubor wa pynmih daka IFP nadooh wa pynkrehkaam yaka ILP haka sngi nyngkong uni u snem ha Manipur, ki pulit wa da booh yow yang haki Checkpoint wow e Permit ha ki Counter wa da wai ha ki thaw khappood ka jylla da man ki kiwa boonkaam bha. Ha ka Mao Gate Counter, kawa em haka District Senapati, haka National Highway 2, heiwa da e waroh 155 tylli ki Permit hadooh 3 waje i janmiet ka 2 tarik.
Ka Counter kawa yang da ki le ngut ki pulit hapoh i pait u Sub-Inspector, da e ki yaki Permit kiwa da dep soi chwa da u Officer in Charge kani ka Police Station. Haka sngi wa nyngkong da e 62 tylli ki Permit ha kani ka thaw.
Kiwa na baar jylla da hap ki wow su T. 100 hadien wa pynyoo ki yaki kot ki sla heidur ka Aadhaar Card wei yei daw wa psiah ki chapoh ka jylla.
Hadien wa dep ya ini da e yaka Permit wa krehkaam 15 sngi yow leh ki iwa emkaam ki.
Katkam ka khubor naka Imphal Free Press, u Additional SP u P. Longpinao, da ong u wa kani ka Permit Counter toh kawa wai waroh 24 kynta wei ym duna ya 100 tylli ki kari wa psiah wa kynthup ya ki kari kamai wa ki kari samen kiwa wan neiliang ka Dimapur.
Katkam ka yukheiñ da chem wa ki bru wa psiah toh kiwa boon na Bihar, pynbood saka Assam wa West Bengal. Boon toh kiwa khih mylla kiwa thooh kreh ha Manipur.
I duna ha ini i rukom e Permit toh wa ym em i rukom boodien ya kiwa psiah hadien wa kut ka 15 sngi. Uwi uwa khih mylla na Bihar, da pyntip u wa da yoh u yaka Permit wa 15 sngi, tangwa i kaam wow kreh u toh emkaam wow sah u palat 3 bnai. Deiwa ong leh wa hapoh 15 sngi daw hap lut u ka bai lai bai wan, bai baam bai sah wei heijooh i por emkaam u wow yoh nong wei ym ye u wow leh ya ini du hapoh 15 sngi wei emkaam por chooh chooh u.
Kam wow pynkynmoo wa ki jait Permit em ki soo tylli wa kyntup yaka Special Category, Regular Permit, Temporary Permit waka Labour Permit. Katkam wa man kattæ da e du ki Temporary Permit da kini ki Outpost wa em ha ki khappood ka jylla wa da soi da u Officer-in-Charge ki Border Police Station.
Lada em kiwon kiwon wa kwah wow pynyinsur yaki sngi ki Permit, hap ki wow yachem wa ki sahep ka Deputy Labour Commissioner wei lada ha kiwon won ki jait kaam na ki Deputy Commissioner ki District.
Katkam i pynbna daka sorkar da em soo jait ki ILP kiwa man kamni ha wah:
Special Category Permit: Ya ini daw e daka Home Department ya ki bru wa man ki Contractor sorkar, kiwa khayi pateiñ, kiwa da dep seiñ khih hapoh ka jylla kamjooh kiwa thmu wow seiñ khih hapoh ka jylla. Kani ka jait ILP toh kawa krehkaam le snem wei lada kwah wow pynthymme yaka daw hap su T. 5,000 haka sien nyngkong wei T. 10,000 manda pynthymme.
Regular Permit: Kani ka ILP toh ka wow e da ki Deputy Commissioner ki jar jiar ki District namo da kiwon kiwon ki chnat wa da e bor da ka sorkar jylla. Kani ka Permit toh neibynta kitu ki bru kiwa wan chapoh ka jylla man ki por deiwa yoh yei kitkhlieh na kiwa chong chnong wa pura ka jylla wei u man ko kawa krehkaam 6 bnai. Daw hap su T. 500 haka sien wa nyngkong neitæ won T. 1,000 manda pynthymme yaka.
Temporary Permit: Kani ka Permit toh kawa krehkaam 15 sngi kawa e ya kiwa uiñke suwari, kiwa mihkhmat yaka khayi pateiñ namo ya kiwon kiwon kiwa wan wow sah du kattu katni sngi donhi hadien wa pynyoo yaka ID wa krehkaam. Kani ka Permit toh kawa ye u e da ki Deputy Commissioner ha ki District wa pait ki, ki Deputy Resident Commissioners lane ki OSD ka Manipur Bhawan ha New Delhi, Kolkata wa Guwahati, ki SDO wa ki Officer-in-Charge ki Police Station kiwa da dep pynbna, ye u yoh leh na Imphal Airport wa ki chnat wa da e bor daka sorkar jylla. Kiwon kiwon wa yaleh ya kani ka Temporary Permit hap ki wow su T. 100 haka sien wa nyngkong wei T. 200 manda pynthymme.
Labour Permit: Kani ka Permit toh ka wow e da u Deputy Labour Commissioner lane da kiwon kiwon ki chnat wa da e bor da ka sorkar jylla ya kiwa kreh mylla wa wanrah da ki Contractor waki Company. Kani ka ILP toh kawa krehkaam 6 bnai wei ye u pynyinsur ka sa 6 bnai.
Da pyntip leh wa ya waroh ki tre chnong ka jylla, ki All India Service Officers yong ka Manipur Cadre wa kiwa hayung hasem ki, ki wakreh Central wa State Government Officer kamjooh kiwa hayung hasem ki, ki chipai (Central Paramilitary Forces & Armed Forces) wa kiwa hayung ki, waroh ki Executive Member yong ki National wa State Political Party kiwa da tipmit, kiwa lai puræ ha kiwa boon ki thaw puræ wa em hapoh Manipur kiwa em ya ki ID Card wa biang u lait ki naka ILP.
(PHOTO: IFP/Paojel Chaoba)
Discussion about this post