Jowai: Ka yung krehkaam u Research Officer, District & Local Research Station & Laboratories, West Jaiñtia Hills deiwa ya krehlang wa ka yung krehkaam ka District Agriculture ynne ka sngi da lehkmen ki ya ka World Soil Day hapoh ka phang “Be the Solution to the Soil Pollution” ha ka yalang wa pynman ha Yungwalieh ka Tpep-Pale, Jowai.
U kongsan ha kani ka sngi, u Kyrmen Shylla uwa man leh u montri ka chnat Printing and Stationery da ong u wa i khyndaw em i i bynta wa emkaam bha ha i krehkaam ka rymaw wei man i leh iwa kordor hadooh kattæ kattæ wei emkaam wow yada ya ka yei man sboh i.
Da klam u leh chaphang kiwa boonjait kiwa ktah yei chait i khyndaw nadooh wa noh roi ya ki Plastic, i jhep, ki sabon sait-that wa pynemkaam i man ka sngi kiwa da ktah bha ya ka rymaw wei da pynchlur u leh ya ki warep wow sdang ki da ka rep wa khlem pynemkaam ya ki sboh wa chna da u bru wei wow thung dieñ.
U Deputy Commissioner ka WJH u Garod LSN Dykes da ong u, “Hawa sdang u Blai da chna u ya i pyrthai wa waroh kiwa em ha ka tangwa u bru won nei kwah rhah u katwa dang lai ki snem da pynsih u ya i khyndaw wei lada kwah i ya ka mynried kawa bha emkaam wow syndong wow yada ya ka khyndaw neibynta ka juk wa daw wan.
Ka B.M. Majaw, District Horticulture Officer, Jowai ha ki ktien waiphang yong ka da khana ko khajiak chaphang ka World Soil Day wei da kynmoo ya kani ka sngi yow wanrah yei sñiawthooh yei emkaam wow pynneh pynsah ya i khyndaw. Da pyntip ko leh wa ka sorkar jylla Meghalaya da chim ko wow sdang boon ki laad wow pynchlur ya ki warep wow sdang ki da ka Organic Farming namo ka rep kam ha ki por warim kawa ym em pynemkaam da ki sboh dawai wa chna da u bru kamjooh ki dawai siat khniang wa chna da u bru kiwa boonjait ki dawai kiwa ktah ya i sboh i khyndaw. Kamtæ da pynchlur ko ya ki warep wow rah khajiak i khyndaw na ki thaw wa rep ki yow yoh u thooh bniah ya kiwon ki jait jhoor, jait soh wa yatoh wow rep ki ka wow leh da ka da ka yung krehkaam ka Research Office.
Neiliang ka B. Nongbri, Research Officer da paan ko yei krehlang ki warep wow krehlang waka chnat Research Officer, District & Local Research Station & Laboratories yow ye ki u thooh bniah yei rukom man i khyndaw yong ki.
Da ong ko leh lada i khyndaw ym man i iwa biang wow rep daw man ko kawa sepai neibhah ymye u pynmih ya ki mar rep.
Da pyntip ko leh wa hadien wa dep wow thooh bniah chaphang i rukom man i khyndaw namo ka Soil Test daw saam ya ki Soil Health Card kawa da booh bniah yei rukom man i khyndaw cha ki warep yow tip ki kiyi ki jait jhoor wa kiwi kiwi kiwa ye ki u rep kawa daw wanrah leh ya ka yoh nong ya ki warep.
Chooh chooh da ong ko la 23,999 ki Soil Health Card da dep e cha ki warep ka West wa East Jaiñtia Hills ha ka sien wa nyngkong ha u snem 2015- 2017 wei ha sien wa ar yong u snem 2017-2019 kamwa 24,000 ki Soil Health Card daw saam hadien wa pyndep ya ka thooh bniah ya i khyndaw ki warep.
Discussion about this post