Jowai: U montri ka chnat puræ puthi ka jylla, u Lakhmen Rymbui ynne ka sngi da saam u ya ki Tablet neibynta ki khynnah Class XII ka West Jaiñtia Hills District ha ka yalang wa pynman ha District Library Auditorium Mynthong, Jowai.
Hawa e u yei klam neibynta ki khynnah, u montri da sneiñ u ya ki ymtoh u chaniah ware du ha ki tiar ka juk wa katni ha ka puræ wei yow pynemkaam ya ki ha i rukom wa ye hi u im lada ym em ki wei ym toh u chah kdoh chah khoom ha ki Smart Phone wa kiwi kiwi. Ha ka pyrthai wa katni kat iwa emkaam u yoh lyngba ka Internet iwa da pynswe leh ya ki bru wow pynemkaam ya i jabieñ yong ki wow thooh yutip bniah iwa da pyntlot leh yei jabieñ ki bru wow pynmih ya ki buit yong ki hi. Heijooh i por deiwa pynbood yei yong kiwi ym pynproh ko ya i jabieñ. Ym em ka stat sayan kawa ye u pyntam ya i bor jabieñ u bru.
Neiliang u DC ka WJH u Garod LSN Dykes da ong u emkaam ya ki khynnah puræ wow booh thong ki wa kam kiwon ki jaitbru kwah ki u man wei ymtoh u bood ya ki bru kyndeh ki bru wa khlemkaam wei ymtoh u man leh ki bru wa pyrkhat du yei yong samen donhi, kiwa tieñslah wa kiwa im samen neibhah wa emkaam u yachem wow yaklam wa kiwi yow yoh u e buit e budia kylliang. Kamtæ da ong u wa emkaam wow man ki bru wa em ka thong wa i kitkhlieh wei ymhoi u e laad ya i rukom man ki bru wow taan chadien ya kiwi heithaw wow ku ki.
Ka District School Education Officer ka M. Pde ha i ktien pdiang burom da ong ko leh wa emkaam wow pynemkaam ya kini ki Tablet ha itæ i rukom wow yoh myntoi yow yarap ha ka puræ ymtoh wow pynswe.
Ya ka yalang da pynlai da ka R.S. Manners, Additional Deputy Commissioner, West Jaiñtia Hills wei neiliang ka Y.R. Mawlong Extra Assistant Commissioner, Jowai da e ko yei ktein sñiawngooh.
Waroh u saam 3076 tylli ki M-TAB cha kiwa puræ Class XII ki 27 tylli ki thaw puræ ka District wa kynthup ya ki skur wa em ha Amlarem C&RD Block, Laskein C& RD Block, Thadlaskein C&RD Block wa ki skur wa em ha Jowai.
Discussion about this post