Jowai: Ka Meghalaya Cement Limited (MCL), wa em ha Thangskai, East Jaiñtia Hills kawa pynmih yei khyndawbilat wa tip leh kam ka Topcem Cement da pynman ko ya ka thung dieñ ha ki bynta wa em ha i thaw yong ka ha kani ka 20 tarik uni u bnai.
U Parliamentary Secretary, ka sorkar jylla uwa man leh u MLA ka thaiñ u Justine Dkhar da emlang u ha kani ka sngi thungdieñ.
Yeini waroh da leh hapoh i yahkhmat u Senior Environmental Engineer, Central Pollution Control Board, Ministry of Environment, Forest and Climate Change, Government of India, Dr. Shantanu Kumar Dutta, heiwa da thung hadooh kamwa 40,000 tylli ki dieñ kiwa kynthup ya 50 jait ki dieñ wa em cha kani ka thaiñ da thung ya ki deiwa pynemkaam ya ka rukom thung dieñ wa tip kam ka Akira Miyawaki kawa mih na Japan.
Katkam i ong u Dr. Dutta, deiwa bood ya ka rukom thung dieñ Akira Miyawaki daw mih noh i khloo wa rben iwa phær du nei thung dieñ katu katni tylli donhi.
U Justine Dkhar da yaroh u yei ini wa leh ka Topcem deiwa ong wa emkaam ya ka la-ær wa khooid, ki um wa khooid kamtæ i thung dieñ man i iwa emkaam dooh.
U President ka MCL, u R.K. Pareek da pyntip u wa ka MCL da dep e ko ya ka contract wa le snem cha ka NEHU wow pynman ya ka takit wa bniah yow thooh laad wow yada ya ka Bei Rymaw. Hapoh kani ka le snem daw thooh tre thij pa thij ya ki mrad hadooh ki dieñ ki siej wa ki phlang wa em ha kani ka thaiñ.
Discussion about this post