Hadien wa chah hiar thma ka Sherpur District Jail ha Bangladesh ha ki paidbah ynnin ka sngi, da em hadooh 513 ngut ki koidi wa da yoh u yut na kani ka patok.
Ini da jia i heipor 4:30 hadooh 5:30 i janmiet heipor i yakhih pyrchah ya ka sorkar iwa da pynbor ya ka Prime Minister ka Bangladesh ka Sheikh Hasina wow hiar chuki ko wei wow yut noh na kani ka ri.
Kini ki bru wa hiar thma ya kani ka patok da rah ki ya ki tiar pynmynsoo kam ki dieñ wa kiwi kiwi wei da thang ki leh ya i bynta kani ka patok kamjooh da thmu ki leh wow hiar thma ya ka Sadar Police Station kawa da chah thang deilang wa kiwi ki yung krehkaam sorkar deilang wa kawi ka Bank wa ki dukan.
Da ong wa ka sorkar da pynchitom ko ya ki 77 ngut ki pulit kamjooh ya u Jail Superintendent deiwa beh kreh chipor ya ki.
Ini i awri da mih i heipor wa dang krehkaam ka Curfew, heiwa u Deputy Commissioner, u Abdullah Al Khairun da khana u wa boon ki thaw hapoh ka District kiwa da chah ktah.
I awri dang joor i ynne ha Bangladesh wot hadien wa da yut ka Hasina na kani ka ri hadien i yakhih iwa wanrah yei yap ki palat 300 ngut.
Ha Dhaka, neiliang ki heh ka Anti-Discrimination Student Movement da tyrwa ki ya i pyrtuid u Muhammad Yunus wow yahkhmat ya ka sorkar khnang wow ye u wow wanrah biang ya i chongsuk.
Discussion about this post