Jowai: Ki ar tylli ki seiñbhalang, ka Jaintia National Council-Khliehriat Circle wa ka Jaiñtia Youth Federation-East Jaiñtia Hills hadien wa da yoh ki ya ka ujor na u Waheh Chnong ka chnong Deinsatlang wei kamjooh leh na kiwa chong chnong ka chnong Deinsatlang heiyatoh wa i dooh bordiñ yong ka chnong Deinsatlang kawa em ha East Jaiñtia Hills District kamwa hadooh ynru snem da booh ko yei eh ya kiwa chong chnong hadooh kattæ kattæ da pyntip u B. Chyrmang General Secretary, JYF-EJH.
Neiliang yong u waheh chnong ka chnong Deinsatlang u Jopthiaw Pohthmi da ong u wa ha ki snem wa da dep da lai booh ki ya ka ujor neiliang yong ka chnong cha ka yung krehkaam yong u Executive Engineer MeECL Khliehriat Distribution Division wow pyntip chaphang ini i dooh bordiñ yong ka chnong Deinsatlang wei i daw wa dooh bordiñ da pyntip wa toh neidaw wa sih u Transformer.
Kini ki ar seiñ hadien wa da yoh ki ya ka ujor da i sñiawkhia da lai booh ki ya ka dorkhat cha u Executive Engineer MeECL Khliehriat Distribution Division u J.D. Sumer neibynta wow kyntu ya ka yung krehkaam wow lai pait ya i eh wa kiwa chong chnong ka chnong Deinsatlang da chem ki hadooh ynru snem wa da hap im ki hei doom, da ong u Skhemmon Lapasam, President JNC-KC.
Neiliang yong ki ar seiñ da dawa leh na ka yung krehkaam u EE MeECL Khliehriat Distribution Division wow pynbiang bor diñ smat cha kani ka chnong manda chem yei yong sakhiat yow lait kani ka chnong na ini i eh yow man ko leh ka myntoi ya kiwa chong chnong neibhah ha kini ki sngi wa ha kani ka juk wa katni ym ye u im khlem i bordiñ i wym ye de wow mutdur kammon im kiwa chong chnong kani ka chong.
Da e leh yaka dorkhat cha u DC ka East Jaiñtia Hills District wa Superintendent of Engineer MeECL Jowai neibynta wow tip ki wow leh ya iwa emkaam.
Discussion about this post