Ka Raij Tuber kawa man kawi na ki Raij wa kmai dooh hapoh Ri-loom Jaiñtia, ynne ka 19 tarik da pyndep ko ya ka lehniam Behdieñkhlam 2024 ha Biar Aitnar, Tuber Kmaichnong, East Jaiñtia Hills.
Ha Biar Blai, ki khon ka Raij na kylleiñ da wanrah ki ya ki Rong ki Rot wa da pynriam har rukom heiwa waroh da wanrah 69 tylli ha kiwa da thoh ya ki kyntien wa kit yumut kam i yalehke Sports, i sih u duma wa kiwi kiwi.
Ya ki Rong ki Rot da wanrah na kylleiñ ki chnong kiwa haap hapoh ka Raij Tuber kiwa em hapoh ka West wa East Jaiñtia Hills.
Ha Biar Aitnar da wan sakhi ya ka da ki Montri ka sorkar jylla wa kynhtup ya u Paul Lyngdoh kam u kongsan, u Kyrmen Shylla, ki MLA, ki MDC ka JHADC, ki Dolloi wa kiwi kiwi.
Neiliang u Kyrmen Shylla hawa e yei klam da ong u wa katni da boon ki khynroo wa ngop ha u drugs kamtæ da kyrpaad u ya waroh khamtam ka imlang sahlang wow krehlang waka sorkar heiyatoh wa ini i sih wa katni.
U Paul Lyngdoh da kitbok u ya waroh deiwa kyrmen wa na kani ka Behdieñkhlam daw ye u yakhun pyrchah ya i sih i roi ha ka imlang sahlang wei da kular u leh wow pynku ya ka poisa yarap ka sorkar cha ka Rs. 15 lak najrong wow chna leh ya ki thaw paitke ki paidbah.
Da ong u leh wa da sakhi u ya ka Behdieñkhlam ha Jowai wa ha Tuber wei ini pynyoo i yei mahajon ka rukom im wa kyrpang ka jaitbru yong i.
Hadien wa da dep noh ya ki rong da em ka Yaslait Niam hapyrdi ka Phang Wah waka Phang Neiñ kawa pynman le wat heiwa ha kani ka yaslait da jop da u waheh na ka Phang Neiñ.
Discussion about this post