Jowai: I por wa krehkaam ka khang chnong namo ka Lockdown wow yakhun pyrchah ya ka khlam u COVID-19 nadooh pyrdi u bnai Wisu hadooh ynne ka sngi da wanrah ko chiboon i myntoi ya ki mrad wa ki sim ki doh.
Hapoh ini i khang chnong ka yung krehkaam ka Divisional Forest Officer Jaiñtia Hills, Wildlife Division da yoh ko u pynlait hadooh 7 jait ki mrad du napoh ka East wa West Jaiñtia Hills District.
Kini ki mrad man ki kynthup ki ya ki langlit (Red Breasted Parakeet wa Slaty Headed Parakeet) kiwa da yoh na Priang wa na Lumpariat, Jowai, West Jaiñtia Hills.
Da yoh leh wow pynlait ya u sniang-khloo (Wild Boar) na Wahiajer, ki khla-sim (Leopard Cat) na chnong Mukoh; Lumpariat, Jowai wa na chnong Saphai.
Chooh chooh da pynlait leh ya ka dhoh (Barn Owl) na St. Claret School, Phramer; u Kui (Himalayan Palm Civet) na Sahsniang wa ka lakang (Oldham Leaf Turtle) na Moosniang, East Jaiñtia.
Ya kini ki mrad da lai pynlait cha khloo Narpuh (Narpuh Wildlife Sanctuary), cha Khloo Blai Chyrmang (Community Reserve), wa kiwi kiwi.
