Shillong: Ka High Level Committee (HLC) wa da chna da ka sorkar wow kyrriah noh ya ki bru kiwa sah ha Sweepers’ Colony kawa ha Them Iew Mawlong, ynnin ka sngi da ong ki wa da lai ko chakhmat wow phah noh ya ka bui cha ka sorkar rap smat katwa ye wow pynkut noh ya kani ka kaam.
“Lada dep i wow pyndep pynbiang yeiwa emkaam waroh, ym pynslem de wow phah cha ka sorkar yeiwa chem ka committee wow e ko yei rai,” da ong u chairman ka HLC, u Prestone Tynsong hadien i yachem wa ki 12 seiñbhalang.
U Prestone da ong u wa kiwa kitkaam ki seiñbhalang da pynsñiaw ki wa ymkwah ki wa ka HLC u kut hi-eh ko kamtu kam kiwi kiwa dadep khlem poi cha ka thong.
“Nga da klam che O wa ka HLC da chimkhia ko ya kani ka phang, dadep chong i leh hadooh san sien wow bichaar hajrong ini. Da klam i leh wa ym em chong kli kti i ha kini ki bnai wa dadep,” da ong u Presrone.
U Prestone da pyntip u leh wa ka HLC dang pynlang chooh chooh ko ya ki kot wa yatoh wa ka Them Iewmawlong khamtam wa yatoh wa i e thaw, da ong u wa ka HLC daw chong biang ko ha kini ki sngi wow wan wei mar yoh ya ki kot ki sla daw phah nob ya iwa chem ka Committee cha ka sorkar.
U Chairman da pyntip u wa ka sorkar dang yaklam ko wa ka Hima Mylliem hajrong kani ka bynta wei ka Directorate of Land Records and Survey (DLRS) da kyntu ko ya ka Hima wow e ya ki sakhi satar heiyatoh wa ki thaw ha Them Iewmawlong.
U Prestone da pyntip u wa ka HLC da phah pynlang biang ko ya ki pyrtuid ki bru kiwa sah ha Sweepers’ Colony.
“Ka tnat pynroi sor ka jylla næ ka Urban Affairs da thoh ko cha waroh ki tnat ka sorkar wow pyntipmit lada em ki bru ka tnat kiwa sah ha Them Iewmawlong, wei dang yang i yeini waroh” da ong u Prestone.
Katkam wa ong u Chairman ka HLC, em 128 ngut ki wakreh ka Shillong Municipal Board (SMB), kiwa sah ha Them Iewmawlong wei ini man i katkam wa pynlang ha u bnai wa dadep.
Choh chooh da pyntip u wa ka Meghalaya High Court hadooh katni ympu em pynmih ko ya kawon kawon ka hukum wow pynsangeh namo e stay order hajrong i chah ujor PIL ka HLC dang ini wa dep.
“Ka HLC toh kawa e yumut donhi katwa ka rai hajrong kani ka phang toh i yong ka sorkar jylla,” da pynrap u chairman ka HLC.
Ynnin ka sngi 12 tylli ki seiñbhalang wa kynthup ya ka HYC, HANM, JNC, CoRP, RBSU, WKSU, WYF, SSSS, JSU, JYF, MPUF wa ka AJSU da yachem ki ya u Symbood Montri Rangbah ka jylla, u Prestone Tynsong uwa man u Chairman ka High Level Committee (HLC) wow kyntu wow pynsmat ya ka kaam wa yatoh wow kyrriah noh ya ki mator na Them Iewmawlong.
U General Secretary ka HYC u Roy Kupar Synrem da ong u “Hadien wa da chna ya ka HLC kattu la kamwa le bnai kwah i wow booddien yeiwa chem ka committee, sñiawkmen i leh wa u montri da pyntip u wa dadep bichaar hadooh soo san sien ha kini ki le bnai ya ini i kaam'”
Chooh chooh da ong u wa waroh ki 12 seiñ kwah ki wa ki bru wa sah ha kani ka thaw toh u kyrriah noh ya ki neibhah i jia ini wa dep da ktah i ya ka jaitbru wa ka jylla hi waroh kawi.
Neiliang u Chairman ka Committee da pyntip u ha ki seiñ wa dadep bichaar bniah hadooh 90 petcent yong kani ka kaam wei daw yaleh u pyndep hi noh ya ka.
Discussion about this post