Kiwa chong chnong ka Koraibari wa em ha thaaiñ Ranikor da ujor ki cha u Montri Rangbah ka jylla, u Conrad Sangma wym yoh ki ya u khoo rachon (PDS) hapoh ka aiñ National Food Security Act (NFSA) na kawi ka dukan Fair Price Shop (FPS) Dealer.
U tre kani ka dukan saam khoo rachon toh u Lipson Ch. Sangma, heiwa da pyndooh u yei hok yong ki kattu katni ngut ki bru wei ini da jia i neidaw wa em i yapiah yapra hapoh ka chnong heiwa da pyndooh noh yei hok yong ki kattu katni kiwa chong chnong.
U Conrad hawa lai pynman ya ka CM Connect h ka 16 tarik da ap u yei nia wei daw na waroh ki liang wei da kular u wow pynyoh yei hok.
Neiliang ka Director ka Supply Department, ka Anita Kharpor da thoh ko cha u Deputy Commissioner ka South West Khasi Hills, heiwa da phah wow pynman yei takit wei wow leh yeiwa emkaam.
Ha ka 17 tarik uni u bnai da wan ki bru ka chnat Supply cha kani ka chnong wa em cha kdong bha wei da chem wa em kiwa chong chnong kiwa da chah pyndooh khoo rachon la chi snem wei da em leh kiwa da chah pyndooh la ar snem.
Kamtæ da pyndam ya ka License uwa saam rachon wei da phah wow pynuiñ u ya waroh ki kot ki sla wei neiliang ka chnat Supply da yaleh ko wow pynyasuk ya ki ar liang kiwa yadait yachrut hapoh ka chnong Koraibari yow pyntikna wa waroh yoh ki yei hok.
Da phah leh ya u Deputy Commissioner ka South West Khasi Hills wow pynchitom wei wow e FIR pyrchah ya uwa saam khoo rachon wei wow pyntikna wa waroh kiwa chong chnong yoh ki yei hok.
Kani ka CM Connect toh yow yoh u Montri Rangbah u yachem wa kiwa chong chnong wei wow ap leh yei ood i naam ki.
Neiliang kiwa chong chnong da yaroh ki ya u Montri Rangbah wa du hadien ar sngi wa pynsñiaw ki yeiwa jia da wan ki bru wow pynbait ya ini i kaam.
Ka CM Connect toh kawa da sdang ha u February 2024 wei da lai yachem ya palat 50,000 ngut kiwa chong chnong wei da yoh ya 2700 tylli ki ujor wei da ye wow pynbait ya 1,127 tylli.
Discussion about this post