Ka sorkar Meghalaya lyngba ka chnat Health & Family Welfare da e por ko hadooh 23 tarik uni u bnai (December) ya waroh ki wakreh sorkar wow chim ki yei tika yada COVID-19.
Ka hukum wa da soi da ka Chief Secretary ka jylla, ka Rebecca V Suchiang da ong wa ya ini da leh katkam ka hukum ka Meghalaya High Court kawa da pynmih ha ka 06-12-21.
Lada em ki wakreh wym hoi wow chim ki yei tika neidaw i chait i khiah, ka District AEFI (Adverse Events Following Immunisation) Committee kiwa em hapoh waroh ki District daw bichaar ki yeini. Wei lada chem kani ka Committee wa biang ki daw wym chim tika, ya kini da lait ki wow chim tika.
Neiliang ka High Court ha ka 6 tarik da phah ko ya ka sorkar jylla wow pynjoor yei pynsñiawthooh wei pynkohngooh ya ki bru wow chim tika ki neibhah ini toh i myntoi yong ki hi wei kamjooh wow yada ya kiwi.
Da e bor ha ka jylla wow wanrah ya ki kyndon pynkrehkaam ya kitu ki wym bien u chim tika deiwa pyndooh nong ya ki heijooh i por leh ka sorkar toh u pteiñ ko yei pynche paidbah hajrong i tika.
Kani ka mukotduma toh kawa dang lai hapoh ka yung bichaar wei daw chong bichaar biang ya ka ha u bnai wa ar u snem thymme.
