Hadooh ka 31 tarik ka Lockdown; ki jait kaam wa chah ka MHA

Ka Ministry of Home Affairs (MHA) ynne ka sngi da pynmih ko ya ka hukum wow pteiñ ya ka Lockdown hadooh ka 31 tarik uni u bnai kam chibynta wow yakhun ya ka khlam u COVID-19 wei kani ka Lockdown u pteiñ ko nadooh ka 18 tarik.

Ka MHA da booh ko leh ya ki kaam namo ki kreh wa dang khang namo ki wym chah u sdang wei kini kynthup ki ya kini hawah:

1. Waroh ki lieñsuiñ kiwa hær hapoh ka ri namo cha baar ri (Domestic & International Flight) lait na kitu kiwa yatoh wa i chait i khiah wei kiwa da yohbor na ka MHA.
2. Ki Metro Rail Service.
3. Ki skur wa ki thaw puræ, ki thaw esikai wa kiwi kiwi toh u khang ki lait noh ki Online/Distance Learning.
4. Ki Hotel, Restaurant, wa kiwi kiwi u man ki kiwa khang lait noh kiwa pynemkaam wow sah ki Doctor, Pulit, ki wakreh ha ka chnat i chait i khiah, kiwa dang sah kiwa uiñke suwari kiwa dang neh hapoh ka ri wa kiwi kiwi kiwa da chah da ka sorkar pyrdi/jylla.
5. Waroh ki Cinema Hall, Shopping Mall, Gym, Swimming Pool, Bar, Theatre, wa kiwi kiwi u man ki kiwa khang lait na ki Sports Complex wa Stadium tangwa ymchah u em bru wa wan paitke ha ki.
6. Waroh ki jait yalang lada yong imlang sahlang, ki kaam seiñ saiñ hima, kaam niam wa kiwi kiwi.
7. Waroh ki thaw mane u man ki kiwa khang.

Da chah ko leh ya kini ki kaam hawah, lait na kitu ki thaw wa em hapoh ka Containment Zone namo ki thaw wa da khang kset:

1. U chah wow lai u wan hapyrdi ki jylla da ki kari, ki kari kamai kam ki Bus, deiwa em i ya sñiawthooh hapyrdi ki jylla.
2. I lai i wan ki kari hapoh ki District daw chong hei rai ki jylla.
3. Toh u bood ya ki kyndon ka Standard Operating Procedure (SOP) heiyatoh wa i lai i wan ki bru katkam wa booh kyndon ka sorkar.

Wow rai ya ki Red, Green wa Orange Zone toh iwa ye u leh da ki sorkar jylla deiwa bood ya ki kyndon ka Ministry of Health & Family Welfare (MoHFW). Ya u pood kini ki Zone daw rai da ki bor District. Ha ki Containment Zone daw chah du ya ki Essential Services deiwa bood thij ya ki kyndon wa da booh da ki chnat sorkar. Emkaam leh wow bood thij ya ka Contact Tracing, i lai sylli ya ki manyung wa kiwi kiwi kiwa emkaam wow leh hapoh kini ki Containment Zone.

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Chooh chooh ka MHA da kyntu ko wow pynkrehkaam ya ka Night Curfew nadooh 7:00 i miet hadooh 7:00 i step da ki bor District.

Wow yada ya kiwa da heh rta (palat 65 snem), kiwa em kjut boonjait, kiwa pun-khon wa ki khynnah (hapoh 10 snem) ka MHA da ong ko wa emkaam u chong-kset ki ha yung lait na ki kaam wymhoi de khlem mih næ wow thooh dawai.

Ka MHA da hukum ko leh wa emkaam wow pynemkaam ya ka Aarogya Setu kawa yarap wow tip lada chah ktah ha uni u khñiang, wei wow yada na i chah ktah. Ki wakreh ha ki chnat krehkaam ka sorkar emkaam wow pynemkaam ki ya u Aarogya Setu ha ki Mobile Phone, ki bor District leh toh u pynchlur ki yei pynemkaam ya kani ka App u Aarogya Setu i wow pynsuk u e yarap cha kiwa emkaam lada ye ki wow chah ktah.

Ka MHA da booh ko leh ya ki kyndon neipor cheipor wow bood ki sorkar jylla heiyatoh wa i lai i wan ki bru wa ki kari kit mar wei ymhoi wow pynsangeh ki yei lai i wan ki kari kit mar khamtam hapyrdi ki ri wa ka India da soi soskular ko wa ki ri wa marjan.

Da phah ko leh ya ki sorkar jylla wa ki bor District wow pynkrehkaam pura ki ya kini ki kyndon wa kiwi ki aiñ wei wow pynchitom ya kiwa leh pyrchah katkam ki kyndon wa emkaam yong ka Disaster Management Act, 2005, ka IPC wa kiwi kiwi.