Jowai: Kam chibynta wow yarap ya ki bru khamtam ya kiwa kjut kiwa emkaam snaam, ka Thomas Jones Synod College ynne ka sngi da pynman ko da ka Awareness cum Blood Donation Camp hajrong ka phang “Be there for someone else, give blood save life”.
Ha chwa wow sdang ka e snaam sñiawbha da em ka yalang wa tbian hapoh ka College kawa pynlai da u G.D. Lyngdoh Program Officer NSS wei ya ki ktien pdiang burom da pachat da u E. Mylliemumlong ANO, NCC hei emlang u Principal ka College u Dr. R.R. Kharkongor, kiwa sikai wa kiwa lai puræ.
Ka Dr. P. Shylla Senior Medical & Health Officer In-charge Jowai Blood Bank, da batai bniah ko ya ki rukom e snaam wa ki kyndon wa haap wow pyndep chwa wow chim snaam na kiwi pa kiwi kiwa wei ym chah de wow chim klumar wei kiwa e snaam leh ymtoh u tieñ ki wow e snaam.
Da ong ko leh wa i e snaam ym ktah ko ya ki bor wa i doh i pran ki bru neibhah ka pynkhlan chooh chooh ko ya i bor bru neibhah da man kamwa pynthymme yei snaam. Da pyntip ko leh wa nei e snaam sñiawbha ki bru, da yarap sakhiat ko chiboon khamtam kitu ki bru wa mynsoo hei ya tyrrah kari, heipor wa kha khon wa kiwi kiwi.
Napyrdi ki 19 ngut kiwa puræ kiwa da wan cha khmat wow e snaam hadien wa da dep sylli bniah ya ki da jied 8 ngut kiwa man kiwa biang wow e snaam ynne ka sngi.
Ha kani ka sngi ka TJSC da saam khusnaam ko cha kiwa puræ yong ka kiwa jop ha ka yakob “Slogan Writing” kawa da pynman ha ka 30 tarik u bnai wa dadep wei ya ka 1st-Prize da yoh da J. Pohlong, 2nd-Prize da yoh da u Mihsalan Dkhar katwa ya ka 3rd-Prize da yoh da ka D. Hadia.
Discussion about this post