Hajrong ka thong wow pynku yei kaam ri sniang hapoh ka thaaiñ chaneiñ mihsngi yong ka ri India wa kynthup leh ya ka jylla Meghalaya, kamtæ ha ka 8 tarik uni u bnai neiliang ka ICAR National Research Centre on Pig, Rani Guwahati, Assam chirup i yakrehlang ka KVK Jaiñtia Hills deilang ka ATMA East Jaiñtia Hills District da yachem ki wa ki warep ka thaaiñ East Jaiñtia Hills District ha East Side Inn Lad Rymbai Bypass chnong Jalyiah, wei da saam ki yei baam sniang, ki Mixer Grinder, ki borti, ki Light heijooh i por da pynsñiawthooh ki cha ki warep heiyatoh i kaam ri sniang, ri syiar, ri ngap, psan dakha wa kiwi najrong i rep i riang.
Ini i lai saam baam sniang kamjooh ki tiar wa emkaam cha ki warep man ko leh chibynta ka Research Extension Farmers Interface Meeting and Input Distribution Programme yong ka ICAR National Research Centre on Pig kawa haap hapoh ka AICRP on Pig, NRCP, A Tribal Sub Plan.
Ha ka yalang chwa wow saam baam sniang da emlang u Dr. V.V Gupta, Director ICAR- NRC on Pig kam u kongsan, ka J.U. Kharpuri, Additional Deputy Commissioner, East Jaiñtia Hills District kam ka symbood kongsan, hei emlang ki sahep sorkar wa kiwa kreh ka chnat i rep i riang, i ri mrad, ki warep wa kiwi.
Neiliang u kongsan hawa klam ong u, kam kiwa chong chnong ka thaaiñ ymtoh u tip du wow baam tangwa toh u tip leh kammon wow pynmih næ ri ya ki sniang.
Wei kamwa ka sorkar India jooh pynyoh ko chiboon ki e sikai neibynta wow lai cha ki warep u yaklam hajrong wow pynku yei rukom rep, ka thong yong kani ka sngi man ko leh yow pynsñiawthooh hajrong kammon u pynku yei pynmih sniang wei kammon i ri sniang yarap ko u pynkylla yei rukom im wa i yoh i kot ha ka thaiñ chaneiñ mihsngi.
Heiyatoh wa ki baam sniang kamjooh ki tiar wa emkaam wa da e ha kani ka sngi, ong u wa da kynjoh ki cha ka Rs.15- 16 lak wa kynthup ki baam sniang kamwa 500 churia, ki Mixer Grinder, ki borti, ki Light kiwa ye u yarap hei im wa man-ka-sngi ki warep.
Khana haroh u waka ICAR ka em ko neibynta wow yarap ya ki warep lyngba i sikai næ e Training ya ki la sñiaw emkaam ki, najrong wow e ki tiar wa emkaam cha ki khnang wa hadien habood lyngba i yoh sikai daw ye ki u pynku da ki ya ki hi wei ye ki leh u man kam kiwa seiñ kaam.
Neiliang ka L. Lakiang, District Agriculture Officer, I/C District Horticulture Officer, I/C Project Director ATMA, East Jaiñtia Hills District, u Dr. M. Lamare District AH and Veterinary Officer, East Jaiñtia Hills District hawa klam da kyntu u ya kiwa chong chnong ka thaaiñ East Jaiñtia Hills District wow kyruiñ ki cha i rep i riang, i kaam ri mrad kawa man ka laad im ja, wei ka wow kamai poisa kamjooh.
Ha kani ka sngi da yoh leh i klam na u Dr. R. Suchiang Subject Matter Specialist (AH&Vety) KVK, Jaiñtia Hills, na u G. Kharshandi Deputy Project Director ATMA, East Jaiñtia Hills District, katwa yei klam pynsñiawthooh heiyatoh wei rukom ri sniang katkam ka juk stat thymme namo (Scientific Piggery Farming) da yoh na u Dr. P.J. Das, Principal Scientist ICAR- NRC on Pig.
Discussion about this post