U President ka Meghalaya Petroleum Dealers Association (MPDA), u Kennedy Khyriem da ong u wa i yakhun yong ka Association pyrchah ya kiwa tooh phñiang kari toh i wym ye chah de, neibhah ka mar wa mut ki wow dai cha ki paidbah da chah tooh noh ha chiteiñ luti, wei khana u leh wa i dooh nong nei chah tooh Petrol/Diesel ha sarokbah NH-6, Ri-Bhoi District dapoi ko hadooh kamwa Rs. 27 klur chi snem.
Da ong u wa ini i tooh phñiang na ki Tanker ha sarok NH-6, Ri-Bhoi District da pynlutphut da ki phaw phaw klur wei kawa da lai da phaw phaw snem, tangwa katni kani ka kaam pyrchah aiñ da mih pyrthai ko deiwa kynreh naphang da ki pulit ka jylla.
U Kennedy da ong u wa ym duna ya 400 tylli ki Tanker kit phñiang wa lai man-ka-sngi na u sarokbah NH-6 nadooh Jorabat yow pynpoi phñiang cha Khasi wa Jaiñtia Hills wa kiwa lai cha Tripura, Silchar, Mizoram, Karimganj, Hailakandi wa kiwi ki jylla wa marjan.
Da khana u leh wa ini i tooh Petrol/Diesel da man ko hadooh 100-200 liter na kawi ka Tanker wei kamwa 25% ki Tanker da chah tooh ki ha ka chi sngi iwa mut 100 tylli ki Tanker, wei ini dapoi hadooh kamwa 10,000 liter i phñiang wa wiar ha chi sngi, wei lada chim yei dor phñiang wa katni deiwa kheiñ kyllooid, i chah tooh ha ka chi sngi dapoi ko hadooh kamwa Rs. 9 lak.
Kamtæ da ong u wa toh u pyndooh jait ya kam kini ki kaam tooh wei da kyntu u ya ki chnong wem em ha tymbud u sarok NH-6 wa ki seiñ wa kreh monsñiawbha wym toh u e laad ki u khayi tooh wei toh u pyntip ki wut-wut cha ki bor ka aiñ lada chem ki ya iwon iwon i kaam tooh.
Discussion about this post