Jowai: U M Sreenivasulu, Director of Micro, Small & Medium Enterprise- Development Institute, Guwahati da pyntip u wa ka sorkar pyrdi da bhah ko T. 1,000 klur wow pynkrehkaam ya kiwa boon ki Scheme neibynta ki Micro Small and Medium Enterprise (MSME) neibynta ka thaaiñ mihsngi (North East) ha kani ka chi snem. Hawa klam wa kiwa pathai khubor ha Guwahati, u Sreenivasulu da pyntip u wa ki MSME toh neibynta waroh ki jylla wa ki Union Territory wei man ki kiwa ar wow e khih hadien i rep i riang hapoh ka ri.
U Sreenivasulu da ong u wa hanlada em chiboon ko Scheme yong ka Ministry of MSME, da chem wa neidaw wa em i duna hei wow pyntip paidbah ya kini ki scheme khamtam ki nongkyndong da ktah i yei rukom yoh myntoi ki paidbah wa da mang kyrpang da ka sorkar.
U Sreenivasulu da ong u wa ka yung krehkaam yong oo toh wow pyntikna wa krehkaam kini ki scheme yong ka Ministry of MSME, Govt. of India wow pynchlur ya ki bru wow seiñ khih ki dei yong ki hi khamtam ka ha ka liang ka MSME ha ka thaaiñ. Ka thong yong kini ki Scheme toh wow kyntu kynrong ya ka nong wa yoh ki bru.
Da ong u wa em boon ki Scheme neibynta ki MSME yow kyntu kynrong yoh i kot wei wow pynduna yei yaphær hei man i long ka imlang sahlang deiwa pynrap wa kini ki Scheme em chiboon ka myntoi (subsidy) neiynta ki SC, ST yong ka thaaiñ mihsngi ka ri.
Da batai u leh ya ki Scheme kam ka Credit Guarantee Fund Scheme (CGFS) wa ka Prime Minister’s Employment Generation Programme (PMEGP).
Hapoh ka CGFS, da e ram cha ki MSE ki wow yarap won wow e khih, katwa ka PMEGP da kam u wa man ko kawa da e myntoi bha ya ki paidbah khamtam ki khynroo khyllood wow seiñ khih ki.
Da ong u leh wa ka Cluster Development Programme (MSE-CDP), ka sorkar pyrdi ym du e yarap poisa ko tangwa yarap ko leh wow chna ya ka Common Facility Centre (CFC), ki Mini Tool Room, Design Centre, Testing Facility, Training and Research & Development Centre wa kiwi kiwi.
Da pyntip u leh wa ka Micro, Small & Medium Enterprise- Development Institute, Guwahati, kawa da sdang nadooh u 1958, toh kawa kreh neibynta wow kyntu kynrong ya kiwa sdang u seiñ khih ha jylla Assam, Meghalaya wa Arunachal Pradesh lyngba ki 6 tylli ki yung krehkaam wa em ha – Tezpur, Silchar, Diphu, Itanagar, Shillong wa Tura.
Discussion about this post