Jowai: Ki pulit ka Jowai Traffic Branch da pyntip ki wa ha u snem 2017 da yoh ki T. 15,03,560 na ki daiñ kuna waphær waphær kiwa yoh na kiwa yah kari ki wym em bood ya ka aiñ Motor Vehicle Act.
Ha ki 12 bnai u snem 2017 wa duna dooh yoh ki toh T. 1,00,800 ha u bnai Thohlakhmi (Feb) wei kawa boon dooh toh ha u Naisan (May) heiwa da yoh ki T. 1,44,570.
Du na kiwa ym em pyndait Seatbelt da yoh T. 1,67,850 na ki 706 ngut ki bru wa ym em khohngooh ya ka hukum wow pyndait Seatbelt.
Na ki bru wa pynyeiñ kari cha ki thaw No Parking da yoh T. 2,32,750, na kiwa yah kari dei muaid da yoh T. 60,300 katwa kiwa yah khlem biang ka License won da yoh T. 46,000 ha u snem 2017.
Kamtæ neiliang ki pulit da kyntu ki ya ki paidbah wow pynbiang ya ki kot ki sla heipor wa yah kari wei wow bood ya ka aiñ yah kari yow lait u jia iwon iwon wa sniawsih.
Discussion about this post