U Erwin Syiem Sutnga uwa man u dkhot yong ka Joint Action Committee hajrong i eh ki thaw khappood da ong u wa i pynbait pood ha ka kylla neibynta ki bhah wa ar ym ye i wow mankaam, neibhah ya ka soskular sñiawthooh yumut namo ka MoU wa da dep soi yow pynbait ya ki 6 tylli ki thaw ha ka bynta wa nyngkong ym em bood katkam ka yurim.
Da ong u wa lada ka sorkar hap ko wow e thaw cha Assam toh u man ko deiwa che, wei neiliang u Erwin uwa man leh u dkhot ka Congress da pynbaad u wa hajrong ini i ya e thaw cha ka Assam da em ka yadai yathied wa joor bha wei kamjooh ka Politics.
U Erwin uwa man leh kam uwa yasaaid aiñ da ong u wa katkam ka yutip wa da yoh, kiwa boon na ki bru saiñpyrthai kiwa em katni ha i bor da yaleh ki katni wow dai dooh syndon ya ki thaw cha ka Assam wei ka yaw yadai yathied dapoi chadooh T. 20,000 klur yow su cha ki kattu katni ki kynhun lada kini thaw lai ki cha Assam. Da ong u wa ya ini dang thooh chooh chooh ki yei sakhiat wei daw pyntip chooh chooh hajrong ini i yadai yathied thaw.
Ki dkhot ka Joint Action Committee hajrong i eh ki thaw khappood wa kynthup ya kiwa synchaar yong ki 6 chnong wa ki tre thaw wa da synran lang da kiwa yahkhmat ka Congress, ynne ka sngi da lai yachem ki ya u Montri Rangbah ka jylla, u Conrad Kongal Sangma wow dawa paitbniah biang chwa ya ka soskular, tangwa neiliang u Montri Rangbah ym bien u wow yachem wa ki neidaw wym em pyntip chwa ki iwa da pynman ya ka JAC wow booh noh du da ka dorkhat ha Secretariat.
Heijooh i por u Erwin da ong u leh wa ki tre thaw wa kiwa synchaar chnong ym e ki wot chi inchi leh i thaw cha Assam, wei chwa wow soi ya kawon kawon ka soskular ka sorkar toh u ya syllok chwa neibhah ym em hok wow soi iyi iyi hajrong ki thaw wa toh yong ki chnong lane kiwa chong chnong.
Hawa kylli, u Erwin da ong u wa dang ye wow pynsangeh lane wow pait biang ya ka MoU, wei da pynrap u wa iyi itæ i yasoi yong ki Montri Rangbah neibhah ini i kaam dang hap wow lai lyngba ka Parliament wei wow leh ya ka sorjamin da ka chnat Survey of India. Da ong u wa ki tre thaw wa kiwa synchaar chnong ym e laad ki wow leh ya ka sorjamin.
Hawa kylli chooh chooh, da ong wa lada ka sorkar ym bien ko wow kyruiñdien yow pait biang ya ka soskular wei lai ki chakhmat, neiliang ka JAC daw lai ko wow tied ya ka dwar ka Supreme Court.
Neiliang u Basan Nongkseh yong ka Hima Mylliem, u Nathaniel Thangkhiew da ong u wa i thaw yong ka bei u kawa da e noh cha Assam ym toh ka thaw wa em i ya kajia, tangwa syndet syndet ha u snem 2018 ka Assam ka sdang ko wow toor pood, ya kawa da ujor leh cha ki bor District kiwa khlem leh iyi iyi deiwa wa ong toh ka kaam yong samen, iwa da pynman ya ka bei yong oo wow lai ujor cha Supreme Court tangwa iwa pynlyngngoh katni wa ya kati ka thaw da e bait cha Assam.
