Ki khynroo khyllood kiwa yaleh ya ka Common University Entrance Test (CUET) ha NEHU Centre, da hap ki wow yang boon kynta yow thoh ya ka Exam yong ka Subject English, wei da khana ki wa ka rukom pynlai ya kani ka Exam man ko kawa da leh thurmur.
Ki khynroo khyllood kiwa da thoh ya kani ka Exam deilang i synraan ki bei ki pa yong ki da sah ki hei doom hajrong i rukom pynlai yong ki bor wa pait ya kani ka Exam ha NEHU Centre, neibhah wym ye u pynman heipor wa da booh wei da man leh kawa da kulmar nadooh i por step heiwa da em i ya khungiat yow pait ya ki Roll Number.
Neidaw ini i thurmur i pynman ya kani ka Exam, ki bei ki pa wa kiwa yaleh Exam da paan pynche ki na kiwa pynlai neibhah i leh ki da ktah ko ya ka mynried kini kiwa lai puræ yow yoh ki u psiah lai puræ College.
Hawa pyrchang wow yaklam wa ki kattu katni kiwa yaleh Exam, da ong ki wa ka Exam wa ki toh u thoh ki toh u sdang ko heipor 3:00 waje i sngi hadooh wa tam 5:00 waje wei ki khynnah kiwa toh u thoh ya ka General Test heipor 5:00 waje da yoh ki wow psiah ha ki kamra hadooh i por 7:30 haroh ynne i miet.
Uwi u manpa uwa da wan thooh ya u khon da ong u wa toh u pynkhreh bha yei rukom pynman Exam neibhah nadooh 1::00 waje da mih wow lai thoh Exam tangwa hadooh wa miet leh ym poi yung u khon.
Uwi won uwa man kam uwa sikai ha NEHU, da ong u wa i pynkhreh yong ka NTA ym em man kamwa da thmu wei ye u man leh neidaw i sien nyngkong wa da pynman ha NEHU wei da mih i duna. Da ong u wa ka sorkar toh u chim ko yei rai wow pynman Compulsory næ ym boi ya ka CUET.
Hawa yaklam wa u Registrar ka NEHU, u Retd. Col. Omkar Singh da ong u wa i slem wow pynman ya ka Exam toh neidaw wym kreh kaam ki Biometric System, kiwa hap wow pynemkaam hawa pynman Exam tangwa da dam u pynemkaam ka hadien wa da yoh bor na ka NTA.
Hawa kylli, neiliang u Registrar da kyntait u wow ong wa ka NEHU ym em da pynkhreh ko kam ka thaw pynman Exam wei da pynlai bait da ka NTA wei ya ki kot Question Paper da pynkhreh da ka NTA.
Discussion about this post