Jowai: I thmu wow pynman ya ka pynsñiaw paidbah namo ka Public Hearing da ka Meghalaya State Pollution Board neibynta i thmu wow pynheh ka Star Cement Ltd. ya ka paar tih moochuni ha Brishyrnot, East Jaiñtia Hills ynne da man i iwa sepai neibhah hadooh wym yoh u pynman ya ka neidaw wa boon kiwa pyrchah ya ka na ki paidbah, ki seiñbhalang wa ka dorbar chnong.
Ya kani ka pynsñiaw paidbah da thmu wow pynman ynne ka sngi toh ha Lumshnong wei ini da pynchrai i ya ki paidbah khamtam ki paidbah ka dorbar chnong Lumshnong kiwa da kam wa ya ini da leh khlem tip næ yohbor na ka.
Hei sngi heipor wa thmu wow pynman ya kani ka pynsñiaw paidbah hajrong yong ka Dorbar Chnong ki seiñbhalang leh da pyrchah ki yeini i thmu wow pynman ya ka na ki daw wa boon wei kawi na ki daw wa pyrchah ya ka toh wa lada yoh u tih ya u moochuni daw ktah ko ya ka rymaw khamtam ka wah Lunar wa Lukha kamjooh leh ya ka khloo Narpuh Wildlife Sanctuary kawa yajan bha kani ka paar.
Hadien wa joor i pyrchah wa i kbai ya ki kyntien wow beiñ ya ka Star Cement wa ki bor sorkar neiliang kiwa pynlai ya kani ka pynsñiaw nadooh ki heh ka MSPCB wa ki heh District kamjooh ki bru kani ka karkhana da mih noh ki na kani ka thaw.
Ha i janmiet won da wan uiñ biang ki heh ka bor District, wa kiwi kiwi cha kani ka thaw wow pynman ya kani ka pynsñiaw heiwa ki seiñbhalang da pynbaad ki wa ini i wan toh i thmu wow pynman sop sop ya kani ka pynsñiaw dei mutdur wa da liwan lut kiwa pyrchah.
Heijooh i por ini i wan ar sien neiliang u Asst. waheh chnong ka Lumchnong da kyntu u ya ki wow liwan ki neibhah wym em yohbor ki wow pynman ya kani ka pynsñiaw hapoh ka chnong.
Chooh chooh da kyntu u ya ki paidbah ka Brishyrnot wow pynman ya kani ka pynsñiaw paidbah pyn ha ka chnong yong ki.
Hadien ini da mih liwan biang ki heh ka sorkar na kani ka thaw.
Hadooh wa pynmih ya kani ka wyrta ympu yoh u pynman ya kani ka pynsñiaw paidbah kamwa da thmu.
Discussion about this post