Jowai: Ka Khynroo Khyllood Committee (KKC) yong ka Seiñraij Jowai kam ka dak wow ksohktilang wa ka sorkar hei kynmoo warom ya ka World Environment Day, ynne ka 5 tarik u Naiynru da pynman ko ka program kyrpang ha Dulong Poh-hali ha i thaw wa em ka Khnap Thangbru.
Ha kani ka sngi chwa wow poi ka bynta i thung ya ki dieñ da em chwa ka yalang wa yahkhmat wa tbian hei pynlai u Ladwan Dkhar, Chairman ka KKC, heiwa da yoh leh yei klam i batai hajrong ka thong yong kani ka sngi na u O.R. Challam, President ka Seiñraij Jowai katwa yei kyntien ngoohblai ngooh syiem won da siang da e da u Sienki Lato, Secretary ka KKC.
Neiliang u O.R. Challam hei klam da ong u wa ka Seiñraij hi ha ka yurim yong i sikai niam da yaleh ko wow sumaar pynneh pynsah yei doh i pran ka Bei Rymaw wa ki dieñ ki siej wa em ha ka, kamtæ hajrong ka thong yong kani ka sngi da khut u yei yakrehlang wei kyrsu kyntu ya ki khon khynroo khyllood ka Seinraij wow chim ki ka yukit neini chakhmat dei wow thung chooh chooh ki dieñ ha kiwi kiwi ki thaw kiwa yoo emkaam kawa man chibynta i ksohktilang wa ka thong yong ka sorkar kawa ong One Citizen-One Tree.
Discussion about this post