Jowai: Ka Joint Action Committee (JAC) yong ki tre kari (truck) wa kit mar ya ki karkhana khyndaw-bilat wa kynthup ya ka All Jaiñtia Cement And Clinker Transporters Association (AJCCTA) wa ka Jaiñtia Hills Truck Owners Association (JHTOA) da pyntip ko wa daw pynman ko ya ka yalang wa kyrpang ha kani ka 12 tarik uni u bnai.
Ka JAC da pyntip ko ya waroh ki tre kari wow wan cha kani ka yalang wow man ha Phamer (TATA Workshop) heipor 10:00 waje i step.
Ha kani ka yalang daw yaklam phyllu yumut hajrong ka hukum (Notification) ka sorkar neibynta i dor kit mar cha ki karkhana khyndaw-bilat wa em hapoh Ri-loom Jaiñtia.
Kamtæ da kyrpaad joor ya waroh wow wan khnang cha kani ka yalang khnang wa ki kaam u man ki kiwa jop.
