Ka Federation of Khasi Jaintia and Garo People (FKJGP) Nongkhroh Unit haka sngi wa dap ko 5 snem da e yarap ko cha ki 20 ngut na ki manyung haka chnong Nongkhroh kiwa em hei duna i doh i pran. Ha kani ka sngi da ya emlang ki dkhot ka FKJGP Thadlaskein Circle wa kynthup ya u President u Rustom Rymbai, Vice President u Kamni Shylla wa u Organising Secretary u Phrangki Kyndait.
Kamtæ ha kani ka sngi ha chwa u saam ya u khoo da em ka yalang wa tbian wa pynlai da u Linus Mukhim, u dkhot yong ka seiñ wei da yoh yei klam pdiang burom na u President Nongkhroh Unit u Medri Mynsong uwa da ong wa ha i dap 5 snem yong ka seiñ da maad ki ya chiboon i eh neibynta ka chnong ka thaw neibynta ka ri wa ka jaitbru, wei ym em u dooh kyrmen ki wei da ong u leh hei dap 5 snem yong ka seiñ hapoh Nongkhroh, da kwah ki u leh ya iwa man kyrpang tangwa neidaw wa em ka khlam COVID-19 wei da pynrkhiñ leh yei lum paidbah, da pyndam noh ya kiwa boon wa thmu hanla kattæ leh kam ka dak wa kmen yei dap 5 snem ka seiñ, da e sñiawbha da u khoo cha ki 20 ngut ki bru kiwa em i duna hei doh hei pran.
Da yoh leh yei klam na u Waheh Chnong u Elwin Mynsong uwa da pynsñiaw yei sñiawngooh wa khroo yaka seiñ kawa da e yarap yaki khon ka chnong kiwa em hei duna i doh i pran khamtam ha kam kini ki por wa jynjar wa em kani ka khlam.
Ha kani ka sngi da ya emlang u Secretary chnong u Kyrmen Rynjah deilang wa ki ckhot chnong yong ka chnong Nongkhroh. Da yoh leh yei klam na u General Secretary ka FKJGP Jaintia Hills u Riky Shylla uwa da yaroh yaka FKJGP Nongkhroh Unit hei lai luti yong ka wa da dap 5 snem heiwa da ye ko leh u yarap da uni u khoo cha kini ki manyung wei da kyntu u leh ya kiwa chong chnong wow bood ryntih ki ya iwa phah yong ka sorkar khnang yow lait na uni u khñiang uwa chyrkhei uwa da pynkhih win yaka pyrthai waroh kawi kamjooh hapoh ka jylla ka yong i kawa da maad yei eh lyngba uni u khñiang kamtæ hap i wow syndong hawa lai i na kawi ka chnong cha kawi ka chnong khamtam katni wa da em kiwa yoh ya uni u khñiang hapyrdi ka ri-loom Jaiñtia yong i.
Kamjooh ha ini i dap 5 snem yong ka seiñ da em leh ki khynroo kiwa psiah thymme wa kynthup ya u Monlang Nongbri, Seibor Mynsong, Ardona Kharbih wa u Bartin Mynsong wei ya i kaam Secretary hadien wa ieh noh kaam u Orestar Rynjah da pynkup ha u Monbhalang Nongbri kam u Secretary wa thymme yong ka Nongkhroh Unit. Ya kini ki dkhot wa thymme da pynskem yaki da u D.S. War Chief Organising Secretary FKJGP Jaintia Hills.
Ya kani ka khubor da phah lyngba u President, u Medri Mynsong wa u General Secretary, u Monbhalang Nongbri.
