Haka sngi dap 5 snem ka seiñ kiwa chet ja skur yoh ki yei pynsñiawthooh hajrong i HIV

Ka seiñ kiwa chet ja sngi ha ki skur wa tip kam ka All Jaiñtia Mid Day Meal Workers Union, ynnin ka sngi da lehkmen ko yaka lyngkhooh sngi dap 5 snem pura i lai luti yong ki neibynta u yakhun u yaleh ya ki phang wa emkaam ka seiñ, wei napyrdi kini ki dawa em iwa da jop wei em won leh iwa dang sahteiñ.

Haka yalang wa pynlai da u Jerry A Suting, President AJMDMWU ha yungwalieh ka Panaliar, neiliang ka seiñ da pynkup burom haroh ko ya ki dkhot wa yahkhmat nyngkong dooh yong ka kamjooh ya uwa e buit, u K.L. Pariat.

Ha kani ka sngi kiwa chet ja skur da yoh ki leh ka laad u tip u sñiawthooh heiyatoh wa u khñiang kjut HIV lyngba i wan pynche u Ajoy Lanong naka Meghalaya AIDS Control Society, Shillong, uwa da ong emkaam bha u man ki bru wa syndong yei rukom im neibhah uni u khñiang da poor bha u katni, heiwa na ki 8000 tam ki bru wa da yoh ya uni u khñiang ha Meghalaya, 60% toh du kiwa na Ri-loom Jaiñtia donhi.

Da khana u leh ya soo jait i rukom yabi wa kynthup lyngba i chongkha kulmar, lyngba i snaam, lyngba u thyrnia wa Inject, naka bei wa punkhon kawa em ya uni u khñiang tæ bi cha ki khon.

Neitæ ka Rinibet Patlong won napoh ka MCSWA da klam pynsñiawthooh ko heiyatoh i e sikai yow pynpliah yei sap waphær waphær ki khon khynroo khyllood iwa ye u yoh hapoh ka MCSWA, kamjooh lyngba kiwi tawon ki NGO næ ki seiñ deiwa kyrchaan ka Skills Meghalaya.

Kamtæ kyntu ko ya ki manbei wow pait bniah ya ki khon ki wym hoi sakhiat hei puræ puthi wow phah cha ki e sikai namo ki Training katkam i sap wa em ha ki khnang yow lait u sepai i por ki. Tangwa kitu kiwa dang bien u puræ won wow nang lai puræ chwa.

Neiliang u u K.L. Pariat hawa e yei kyntien sneiñ, da ong u hei lai luti wa 5 snem ka seiñ, sñiawthooh i wa i chait i khiah toh iwa emkaam tam wei i kjut wa da joor bha katni toh i kjut dih drugs, kjut HIV kamtæ da khut kyrpang ya u Ajoy Lanong yow pynsñiawthooh u hajrong kani ka kjut.

Heijooh i por kyntu u leh wa emkaam u mih chakhmat wow klam khana ya kani ka kjut ha ki khon ki kti, kiwa ha-yung ha-sem, wei lada em i wit i thut heiwon heiwon leh klam khana wym toh u chim dei kynja dih neibhah ini i wow pynsih yei im.

Wei kitu ki bru wa im lyngkar leh toh u pynemkaam da u jri (Condom) heipor chongkha khnang wa i kjut HIV lait i wow poor.

Yooluti u wa dei yakrehlang, ya sñiawthooh yumut lang, i yatylli daw ye u yakhun yeini i kjut. 

Kiwi won wa e i klam kynthup yaka Phiyoris Syngkon, President Block Thadlaskeiñ kawa da khana yaka parom tbian i lai luti ka seiñ, ka Joycefull Lypon, General Secretary AJMDMWU wa kiwi.