I lehkmen dap 75 snem ka Ammutong Govt. LP School ynne ka sngi da man i leh i lehkmen wa rap khroo chooh chooh neibhah wa ha kani ka jooh ka sngi u Montri ka chnat Puræ Puthi ka sorkar jylla u Lahkmen Rymbui da booh mooyurim haroh u yow chna thymme noh ya kani ka yung skur hei lut wada mang T. 44,78,448.
Kani ka Ammutong Govt. LP School haap ko hapoh ka Amlarem Civil Sub-Division, West Jaiñtia Hills District wei da seiñ yaka ha u snem 1947 da ki waheh ka Balang u Blei Ammutong, hadien i chakri yong ka wow e i tip i stat kam ka skur Mission, ka JHADC da tipmit ko ka wei da pynlai yaka deilang ki bor chnong.
Tangwa kat nang lai ki por ka puræ puthi nang ku ko dei yakrehlang ki bei ki pa waki khynnah skur, kamtæ ka sorkar jylla da chimkti ko wow pait noh yaka hadooh katni, da khana ka Headmaster ka skur, ka A. Lamat.
Neiliang u Lahkmen Rymbui uwa man leh u MLA ka thaaiñ ong u, “Ka hok yong u paidbah boon bha ko tangwa chong hei stat kiwa mihkhmat kammon u pynyoh”.
Kamtæ pynsñiaw u yei sñiawngooh ya u Blai hajrong i ye u wow wanrah ki kaam pynroi hapoh ka chnong ka thaaiñ.
Heiyatoh wa ki thaw puræ hapoh ka thaaiñ Amlarem, ong u boon da biang lut nadooh ki LP, ki UP waki Secondary School, kamjooh kiwa sikai leh da biang wei wym em de ka daw wow pynman ya ki khynnah u dam skur ki.
Hanla kattæ leh kyntu u nadooh ya kiwa sikai, ki BRC, ki CRC wow kreh chitom ki khnang yow lait u em uwi wot leh wa dam skur chiteiñ por.
Hawa pynrap wa i stat da e bor ko ya i wow tip u pait yaki laad waphær, deiwa kyntu leh yaki paidbah u chim kabu ki yaki laad yarap naka sorkar heiyatoh u pynku wei sdang yei khih i khan. Kamjooh wot neibynta ki warep leh ka sorkar da mang ko boon ki laad yarap.
“Man kiwa em i mynsien u tei wei kammon u wanrah myntoi yaka chnong ka thaaiñ, hapoh kini ki san snem boon i myntoi wada wanrah O, hanla ym ye u pynyoh lut 100% leh, tangwa kamwa man katni heiyatoh wa ki yung skur wada mang mar T. 37 lak kawi, 10 tylli toh da dep chna, katni won da mang T. 44 lak tam kawi neibynta 10 tylli ki skur, iwa mut waroh 20 tylli ki Govt. LP skur wada yoh myntoi,” ong u Lahkmen.
Kiwa da yoh yarap lyngba ka Border Area Development won khana u toh ka LP School Amlarem, Jaraiñ, Nongtalang wa kiwi.
Boon ki skur da ye u pynbha pynmiat neibhah haka juk Digital, ka thong ka sorkar katni toh deiwa yoh yaki skur wa bha, daw ye u booh yaki kor ki bor nadooh ki Smart Class, Digital Classroom, Smart Library kawa man chibynta u pynku chooh chooh yei puræ puthi.
Kiwi won wa e i klam kynthup yaka ka Sub-Division School Education Officer, ka Sowan Pyrtuh, u waheh chnong, u Lamphrang Shylla, ka Saira Pohsngap, CRC Coordinator Ammutong wa kiwi haka yalang wa pynlai da u Majesty Sten, Secretary Chnong.
Ha kani ka sngi da pynkup burom haroh ya kiwa sikai warim kani ka skur wei da pynlait haroh u Lahkmen yaka kot Souvenir yong ka skur.
