Ka mukotduma PIL wa da yaleh da ka Synjuk Ki Waheh Chnong Jowai pyrchah yaka Jowai Municipal Board waka sorkar jylla da chong bichaar biang da ka Meghalaya High Court ha kani ka tayaaw heiwa waroh arliang da ong ki wa i kaam da sdang i wow lai bait.
Ka yung bichaar da sñiawkmen ko yeiwa da ye u leh heipor wa em ka Behdieñkhlam iwa da yarap wow pynstiñ ya ini i kaam wa yatoh wa i jhep heiwa da ong wa ini wa da leh ka Municipal katni ymtoh u sangeh wei toh u kreh lang wa ki bor District kamjooh ki waheh chnong yow pyntikna wa i wan kit jhep toh u lai bait i.
Ka High Court da phah ko leh ya ka sorkar jylla wow pyntip ko kammon da lai i kaam wow chna ya ka thaw noh jhep wa pura kawa da toh u krehkaam noh chwa u kut uni u snem.
Iwa phylla won wa hapoh ka yung bichaar da ong wa da lai bait i kit jhep tangwa kiwa chong chnong won ym em yoo ki yeini wot hadien wa da dep pynbait wow wan kit jhep le sien chi tayaaw iwa ar sien yei jhep wa pyut wei chi sien yei jhep wym pyut.
Hadien ini won da rai wow jied dei thaw wow sangeh ki Truck kit jhep yow wan noh jhep ki bru wei ini leh toh i wym krehkaam wei iwa ye u wanrah chooh chooh yei tngit i jakhlai lada wan ieh ki bru yei jhep tangwa ka kari won ym ym wan kit ko.
Em ki dong ha Jowai wa ha ini chi bnai da wan kit jhep du chisien donhi wei leh ki wym jooh em tang u yoo leh ya ki Truck kit jhep ka Municipal.
Kamtæ da yoo lakam wa da thok hakhmat ka yung bichaar neibhah wym em kylla i wan kit jhep na yung ki bru tangwa da khana wa da miat bha i kaam katni.
Discussion about this post