Ki seiñbhalang kiwa em hapoh ka yakhih Save Hynniewtrep Mission da toor syndon ki hakhmat ka yung sah u Montri Rangbah (CM Bungalow) kawa ha Polo ynne ka janmiet wow thang ya ki dur bula yong u Montri Rangbah ka jylla Meghalaya, u Conrad K Sangma, u Montri Kaam Pohyung ka jylla, u Lahkmen Rymbui, u Montri Rangbah ka Assam, u Himanta Biswa Sarma wa yong u Montri Kaam Pohyung ka ri India, u Amit Shah.
Mar ya poi ki dkhot seiñbhalang hakhmat ka pchem yung u Montri Rangbah, ki pulit leh dapoi ki deilang wa ki Magistrate yow khanglaad ya ini i thmu. Neiliang ki bor pynlai District wa ki pulit ym e laad ki ya ki seiñbhalang wow thang ya ki dur bula ha katai ka thaw deiwa phah kyrriah cha kiwi won ki thaw, neidaw ini wym chah ki pulit wa ki bor District wow pynman ya ka yakhih hakhmat yung u Montr Rangbah, da mih leh ka thma ktien kawa joor hapyrdi ki dkhot seiñbhalang wa ki pulit.
Neiliang ki seiñbhalang da pyn-eh bait ki thrait wei ym kyrriah ki yei yakhih yong ki cha kawi won ka thaw, heiwa da kbai wow beiñ leh ya ka sorkar Meghalaya wa sorkar Assam wa ya ki pulit yong kitai ki ar jylla leh. Hadien i yaklam sñiawthooh, ki seiñbhalang da kohngooh ki wow kyrriah noh rap cha wa wah ka yung u Montri Rangbah yow thang ya ki dur bula.
I mih yong ki seiñbhalang ynne ka sngi wa kynthup ya ka HYC, HANM, CoRP, JSM wa EJNC toh yow beiñ joor ya waroh ar tylli ki sorkar hajrong i um snaam ha ka chnong Mukroh hawa ki pulit Assam da la siat yap ki ya 5 ngut ki waheh kani ka chnong hei step yong ka 22 tarik uni u bnai.
