Ki pulit ka West Jaiñtia Hills District da pyntip ki wa em kiwa pyrchang wow chim kabu ya ki khynroo khyllood hapoh ka Presidential Youth Empowerment Scheme deiwa kular wow e yarap poisa ar snem dei wym em ong neibynta kiyi namo kawa neiwon kani ka Scheme tangwa da booh donhi yei lama ka ri Nigeria, India wa kiwi de ha kani ka Website.
Manda lai ha kani ka Website da pynyoo syndon ya ka Form kawa paan yei pyrtuid, ki email, thaw sah, ka ri wa kiwi kiwi wei hadien wa pyndap yeini da phah pyndap sa kawi ka Form kawa kylli yei puræ puthi, i khih i khan, i rta wei hadien ini da kular wa da pynkhreh ya ka poisa wow yarap ya ki tangwa hap ki wow ‘Share” ya ka Link kani ka Website wa ki 15 ngut ki bru lyngba u WhatsApp lane wa 5 tylli ki WhatsApp Group.
Da pyntip cha kiwa pyndap ya ka Form wa ym poi ka poisa ki lada ym leh ki ya ini waroh.
Hadien wa leh ya ini daw paan sa ki Bank Account wei hadien wa leh ya ini daw poi cha ka Website wa dai mar tang ka poisa ym poi wei manda leh biang sa chisien yei jooh man ko kamjooh bait wei ha kani ka Website ym em e Phone Number, email-ID lane kiwon kiwon yow tip wa kiyi wa leh ya kini. Tangwa da suba toh ki kaam thok wa tip kam ki ‘Nigerian Scam’.
Kini ki jait Website toh kiwa pynlang pynlum yei email, phone number wa ki pyrtuid ki bru yow chim kabu ki hadien lynga ki email lane deiwa phone yow pyntip cha ki wa jop ki ya kut-jait ki mar kamwa da ngat kiwi kiwa boon.
Kamtæ da kyntu ya ki paidbah wa lada em wa yoo ya uni u link cha ka website youth-empowerments.ethut.co wym toh u click oo.
