Ka Education Cell yong ka Khasi Students’ Union, ynni da phah chithi ko cha ka Dr. Ampareen Mazel Lyngdoh kawa man leh kam ka Montri ka chnat i chait i khiah yong ka jylla, hajrong ki phang wa yatoh wa ka bhah lai puræ MBBS kawa da jooh mang da ka sorkar jylla neibynta ki khynroo khyllood man-u-snem.
Neiliang ka seiñ da paan pynche ko na ka chnat haooh katwon tylli em ki Seat neibynta kiwa lai puræ Doctor kamwa da jooh phah da ka sorkar jylla cha ki thaw puræ waphær waphær ka ri.
Ka seiñ da kyntu ko ya ka chnat wa lada jia wa ki Khasi, Jaiñtia wa Garo da kynjoh wei poi ki cha ka Open Category, ya kam kini toh u pynpsiah bait ha ka Open Category, khnang wa kiwi daw yoh ki u psiah hapoh ka Reserved Category yow rap boon kiwa yoh bynta lang.
Da ong leh wa ya kitu kiwa pyndep ya ka NEET Exam wei kiwa poi cha ka kyrdan wow psiah cha ka All India Quota, ya kam kini leh toh u e laad wow jied ki da kani yow rap boon chooh chooh kiwa yow bhah wow lai puræ Doctor.
Ka seiñ da dawa ko leh wa ka sorkar toh u pynbait ko ya kani ka bhah lai puræ Doctor deiwa che wei deiwa khooid ka wym em leh chiliang wei ymtoh u murieh yeiwa sakhiat.
Ka seiñ da wer da kyrpaad ko ya ki chnong ki thaw ha kylleiñ ka bri u Ynñiawtrep wym toh u e kot wow pynsakhiat kam ki Residential Certificate ya ki wym toh ki paradoh parasnaam, neibhah ini daw ktah ko yei lai puræ wa da mang kyrpang ya ki khynroo tre ri ka Bri Ynñiawtrep neibhah kam ini da dep jooh jia ha u snem wa dadep, heiwa ka seiñ da hap ko wow yieñ pyrchah wow dawa pyndooh wei pyndam ya uwi u baar jylla uwa da kam toh u tre chnong.
Da kyntu leh ya ka sorkar wym toh u pdiang kulmar ya ki kot ki sla yong ki baar jylla kiwa myllien u yah bakla wei kamjooh ki wym toh kiwa chong chnong ka jylla du yow yoh bynta ha ka bhah lai puræ Doctor deiwa knieh yei hok yong ki tre chnong.
Discussion about this post