U MLA warim ka Ranikor uwa da dep wow pynbna kam u kyrtong ka National People’s Party (NPP) ha ka Election MLA kawa daw wan, u Martin M Danggo da kyntu u ya kiwa kyrchaan wow pynlait noh ya oo na i kaam wow man kam uwa mihkhmat yong ka Constituency, tangwa da ong won u wa lada ki paidbah kwah ki wow nang yakhun, u chong hei rai yong ki na kawon ka Party u phah ki wow yakhun, wei da klam che u wa hadooh katni ym pu em mih u na ka seiñ NPP.
Ini i klam yong u Danggo ya kiwa kyrchaan toh hadien wa mih ha ki laad pathai khubor wa oo kam u MLA warim ka Ranikor uwa jooh man leh kam u Lamphang warim hapoh ka Yungdorbar Chna Aiñ, ym yakhun de u na ka NPP, tangwa daw yakhun noh na ka seiñ Bharatiya Janata Party (BJP).
Katkam i klam yong u Danggo, da kyrpaad u ya kiwa kyrchaan wa kiwa yahkhmat wym toh u phah de ya oo wow yakhun Election neidaw wym em poisa.
Tangwa kamwa man hi katni ka rai wa khaddooh chong ko ha kiwa kyrchaan lada u lai thap pyrtuid namo u dam wei na kawon ka seiñ u yakhun lada u lai chakhmat ha kani ka Election.
