Ka Khasi Students’ Union (KSU), West Jaiñtia Hills Unit, ynne da pynsñiaw ko yei sñiawkhia yei wym em leh ka sorkar yeiwa emkaam heiyatoh i kynaad hapyrdi ki Karbi ka Assam wa ki Pnar ha Khanduli.
Ka KSU da dawa ko wow pynbait noh chisyndon ya ini i mih kulmar na i por cha i por chwa wow lai chakhmat wa i pynbait pood.
Kam wow pynkynmoo wa la chi bnai kattu da mih ma mih i yachoh yadat, i ya mai, i ya thang yung trep ha kani ka thaaiñ khappood ka Meghalaya wa Assam.
Neiliang u President ka KSU West Jaiñtia Hills District, u Laitphar Syngkrem hawa yaklam wa kiwa thoh khubor da ong u wa ka Karbi Anglong Autonomous Council (KAAC) da pynyieñ ko pyrchah ya ka aiñ ya ka khyrdop khrong dan namo ka Toll Gate ha chnong Khanduli kawa dang haap hapoh ka jylla Meghalaya.
Da ong u wa neiliang kiwa chong chnong ka Khanduli da lai tympra ki ya kani ka Toll Gate tangwa da wanrah ko yei pynkulmar hapyrdi ki Pnar wa ki Karbi wa em ha kani ka thaaiñ.
Chooh chooh da ong u wa da em i suk hapyrdi ki arliang hadien wa tympra ya kani ka khyrdop khrong dan tangwa ki Karbi da lai thang ki ya ki yung trep wa em cha ki thaw rep wei da khang ki leh ya kiwa chong chnong ka Khanduli wow lai rep ha ki thaw wa dang haap hapoh ka Meghalaya.
Da ong u leh wa ini da wanrah ko yei yachoh yadat hapyrdi kini ki ar jaitbru hadooh wa ka Dorbar Chnong Khanduli da khang ko ya waroh ki jait khayi pateiñ hapyrdi ki Pnar wa ki Karbi.
Kamtæ da kyntu u ya ka sorkar kamjooh ya ka JHADC wow pynbait ya ini i kaam yow yoh ki bru ka jylla wow lai rep deiwa lai yaklam wa ka sorkar Assam kamjooh ka KAAC.
