Ka Dorbar Chnong Mawlai Phudmuri da klam che ko wa ym pyrchah yei e tika wow yada COVID-19, tangwa da rai leh wa ym e laad ya kiwon kiwon wow pynbor ya kiwa chong chnong wow lai chim tika deiwa maham deiwa pynbor. Neiliang ka Dorbar Chnong da phah ko leh ya ka khubor cha ka sorkar wym toh u maham wow pynsier mynsien ya ki paidbah ya poi pathan cha ka yakhih paidbah wa chyrkhei.
U Waheh Chnong, u Sylvester Kurbah da ong u wa ka sorkar ym toh wow thombor ya kiwa dooh wa duk, tangwa toh wow paitbha yei miat ki paidbah neibhah ya ki da jied da u paidbah, deiwa pynrap wa lada leh kamke sa ya uwa dooh wa duk, ha u snem 2023 daw pynyoo won kammon.
Da pyntip u leh wa ka Dorbar Chnong da chong ko ya ka Executive Committee ynne ka sngi deiwa emlang ki muktiar kiwa sah ha ka chnong wow yatai sani bha hajrong ka hukum wa da pynmih na ka yung krehkaam ka Deputy Commissioner, wa ki paidbah ki wym chim tika yada COVID-19 ym chah wow wai ya ki dukan næ wow kamai ya ki kari.
Da ong u wa kam kiwa chong chnong hapoh ka ri India, ki paidbah em ki yong ki hi i hok wei ym ye wow pynbor leh wow chim yei tika yada COVID-19, da pyntip u leh wa ka chnong da chim ko ya i rai wa kiwa chong chnong kiwa kwah wow e tika ye ki u lai tangwa lada em kiwa maham ya kiwa chong chnong ki wym lai chim tika, ye ki wow pyntip cha u Waheh Chnong.
Da ong wa neiliang yong ki daw phah ki da i thoh cha ka Deputy Commissioner hajrong ini i pynmih ya ka hukum, wei lada ka DC ym ap ko ya ini, neiliang ka chnong da pynkhreh wow ujor leh da ka PIL ha Kachari.
