Ka Education Cell yong ka Khasi Students’ Union (KSU) da pynsñiaw ko yei sñiawkhia wa khroo hajrong i chim rai yong ka sorkar jylla wow pynkrehkaam biang yei pyndooh bordiñ (Load Shedding) ha kam ini i por heiwa boon kiwa lai puræ yong ka jylla hi waroh kawi dang em ki hapyrdi i leh Exam waphær waphær.
Ka seiñ ha i yachem wa u montri ka chnat bordiñ u James Sangma haka 8 tarik uni u bnai da dep pynsñiaw ko yei bynta wa em Exam kiwa da sdang nadooh ka 15 tarik uni u bnai wei da pynsñiaw leh yei sñiawkmen leh du hadien arsngi da pyndam yei pyndooh bordiñ.
Tangwa ka seiñ da dap ko dei khyrngiat wa du hadien chi tayaw i pyntikna yong u montri wei hapyrdi san sngi i lai ki Exam, ka sorkar jylla ha ka 19 tarik da pynbna ko wa da yoh Notice ka MePDCL wow hap pynkrehkaam biang yaka Load Shedding ha ka jylla.
Ka Education Cell yong ka seiñ da beiñ joor ko ya ini i leh yong ka sorkar wa khlem yumut wa khlem pyrkhat yaki paidbah wei khamtam dooh ya kiwa lai puræ. Ka seiñ ym pdiang ko ya ini pynman ‘langknia yaki paaid ka jylla du neidaw wa leh Politics wa tngit yong kiwi ki ar wei lyngba kani ka kyrwoh ka seiñ da klam che ko wa ka seiñ ym suki kiaw wei kasorkar jylla hap ko wow chim yei bahkhlieh lada mih ki kynrum kynram ha ki thaw puræ neidaw wa pyndooh bordiñ.
