U President ka Hynniewtrep National Youth Front (HNYF), u Sadon Blah da ong u wa i oor yap ki 5 ngut ki paradoh parasnaam ha ki kuli yong ki pulit Assam ym toh de ka sien wa nyngkong, tangwa iwa da dep jia leh ha Langpih wei da em leh i chah beh chnong ki tre ri tre muluk.
Da ong wa hawa em kam ini i jia ki seiñbhalang na Assam da smat ki wow wan khroh wym lai da ka luti umsnaam, wei ki seiñbhalang na Meghalaya leh ki pdiang ki ya itæ i man yatylli ka thaaiñ, tangwa ini i pyntyrha na i por cha i por ye u poi u pood wym ye chah de.
Da ong u wa i wym ye ka sorkar wow pynbait ya u pood u ang da boon snem da pynman yei joo snaam ki paradoh parasnaam, wei da ong u leh ya ki ar tylli ki sorkar ka Meghalaya wa Assam wym toh u pyrchang u pynbait ya u pood u ang dei snaam, tangwa da i suk wa i ya hunlang.
Da ong u wa hei jia wa malu mala hei lai paidbah yong ka seiñ FKJGP, ka sorkar da kem lut ko ya kiwa da suba, wei ha kani ka kynti ka kamram wa nyngkong yong ka sorkar Meghalaya toh wow lai kem noh wut-wut ya ki pulit Assam nei thaw wa em ki neibhah i jia ha Mukroh da dooh yei mynsien bru.
