Jowai: “Ham tieñ u e snaam” kbai ki dkhot ka JSU, ki khynnah puræ ka Kiang Nangbah Govt. Higher Secondary School, Marian Hill Secondary School, ki dkhot ka NSS wa kiwa kreh ka Blood Bank, Jowai ha ka lai kjat wa pynman kam chibynta ka National Voluntary Blood Donation Day ynne ka sngi.
Kani ka lai kjat toh kawa sdang nadooh na Madan Daimasi Ladthadlaboh, Iawmusiang hadooh wa poi ha Blood Bank wa em ha Panaliar, wei man ko kam chibynta wow pynsñiawthooh paidbah yei emkaam u e snaam sñiawbha kawa yarap ya ki bru wa mynsoo, ki kynthai wa kha khoon, kiwa chah sumaar yow yoh laad ki u im.
Manda poi ha Blood Bank da pynman ya ka yalang wa tbian heiwa ka Dr. P. Shylla da khana ko wa deiwa wan e sñiawbha ki bru ya i snaam yong ki, da ye u yarap ya kiwa boon ki bru wa mynsoo hei tyrrah kari, kiwa dang kha khon, kiwa haap khon wa kiwi kiwa chitom wei i yoh snaam ki da ye ki u im biang, kamtæ i e snaam sniawbha toh i kaam wa khroo bha wa ye u yarap para bru wei boon ki bru wa yoh yarap toh kiwa ym tipmit i.
Da ong ko leh i e snaam ymtoh iwa sih iwa ktah yei doh i pran u bru namo ka bru neibhah ha u bru em kamwa 5-6 liter i snaam wei heipor chim snaam da chim du 350 ml donhi wei ki bru ye ki u e snaam man ka 3 bnai.
Chooh chooh da ong ko wa i e snaam toh iwa bha neibhah man i kamwa pynmih thymme yei snaam wa em hapoh i doh i pran.
Da yooluti ko leh wa neini chakhmat daw boon kiwa wan e snaam, neibhah lada ym wan e snaam ki daw duna snaam hapoh ka Blood Bank wei boon ki por da chaniah ki ha ki Replacement Donor namo kiwa e snaam kylliang neibytna kiwa ha yung ha sem yong ki kiwa yoh snaam.
Da pynkut ko deiwa ong wa kiwa wan e snaam man ki leh ki bru wa chait wa khiah wa ye leh u yada na ki kjut klongsnaam.
Discussion about this post