U dkhot ka Congress Legislature Party (CLP) uwa man leh u MLA ka Mawlai, u Process T Sawkmie da ong u wa ki 5 ngut ki MLA ka Congress daw kyrchaan bait ki ya ka sorkar synrop Meghalaya Democratic Alliance (MDA) kamwa da rai wei ym hap de wow kylli wow dam noh u kyrchaan neibhah ym mih de.
Hadien ini i rai yong ki MLA, ka All India Congress Committee (AICC) da rai ko wow Suspend chwa ya waroh 5 ngut ki MLA kiwa da lai wow e kyrchaan ya ka sorkar wa da yahkhmat da ka NPP nadooh ka 8 tarik uni u bnai, khlem da tip ki heh ka Party. Neiliang ka AICC da paan pynche ko leh na waroh 5 ngut ki MLA kiwa lai yabi wa ka sorkar wa emlang ka BJP.
Ynne ka sngi 14 tarik, waroh 5 ngut ki MLA ka Congress da yachem lang ki hadien wa ka AICC da Suspend noh ko ya ki. Katkam i pyntip u PT Sawkmie da ong wa katwa ki MLA dang yang ki ya ka chithi na ka AICC, hadooh ynne ka sngi ka khubor kawa che toh wa waroh 5 ngut ki MLA daw em bait ki wa ka sorkar.
U MLA ka Congress da pynsñiaw u yei sñiawlyngngoh leh wa ha i por wa ki 12 ngut ki MLA ka Congress mih ki, cheiwon wiar ka AICC wei ileh wym ong ki iyi iyi lane wow Suspend.
Ha iwi i liang u Process da ong u wa kamwa man katni, waroh 5 ngut ki MLA dang em bait ki wa ka Congress, wei ye ki wow yakhun bait leh na ka Congress ya ka Election 2023, deiwa pynrap wa boi ye u rai manda poi i por lada daw yakhun naka Congress lane na kiwi ki Party.
