Ynne ka sngi man ko ka sngi wa da pyndep ya ka lehniam Behdieñkhlam ka Raij Ialong kawa man kawi na ki soo Raij namo ki Soo Langdoh kiwa leh ya ka lehniam Behdieñkhlam hapoh ka Elaka Jowai.
Kini ki Soo Langdoh na ki soo Raij wa kynthup ya u Langdoh Kongwasan Chyrmang, Langdoh Jowai, Langdoh Tuber wa Langdoh Ialong.
Ha uni u snem ka Raij Chyrmang ym em ye ko u pyndep ya kani ka lehniam neidaw wa da sdang pynkrehkaam wot ya ka Lockdown ha waroh kawi ka ri wow yakhun ya ka khlam u COVID-19.
Neiliang u Dolloi ka Elaka Jowai, u Puramon Kynjing, ynne da ong u wa waroh ki paidbah kiwa emlang wa kiwa da sakhi ya ki kaam niam wa i lehniam toh man i neibynta i kyrkhu na ki Blai Chnong Blai Thaw wa na u Trekirot.
“Katwa yei pyrthai, ki Blai ki Syiem da ekti ki ha i ki bru wow chakri i katkam i emkaam yong i iwa man-ka-sngi wow chakri dei mynsien Tip Bru Tip Blai”, da ong u Dolloi.
Chooh chooh da ong u wa emkaam wow bood ya ki kyndon wa ki aiñ ka sorkar kam heini i por wa yakhun pyrchah nei poor ka khlam COVID-19.
Da ong u leh wa kam ki bru emkaam u krehlang wei ymhoi u ong wa da dep ka kaam niam wow lehmon wei wow kheiñstiñ neibhah i kjut toh iwa mih na i ki bru katwa kamtæ emkaam wow man kiwa tayar wow yada wei wow thooh laad wow yarap ya kiwi.
