U Dr. Nichwa LS Nongtdu, Consultant Physician & Diabetologist MBBS, MD, FIDM uwa na ka chnong Khliehriat Dkhiah East, East Jaiñtia Hills District uwa da dooh noh ya ka kjat tidiang hadien i jia chah tyrrah kari heiwa da ban ka Truck ya ka kari u iwa da jia ha Mawblei, Shillong hei miet ka 17 tarik u Naikhynde 2022, iwa da yah luti ya oo katni da i wym jooh poi pyrkhat u neibhah i thrang yong oo toh wow lai kreh cha baar ka ri India hadien wa dep pynpliah u yei puræ tangwa ini ymem de man i kamwa thrang u.
U Dr. Nichaw da pyndep u ya ka MD na Safdarjung Hospital New Delhi, da pyndep u ya ka Fellowship yong oo heiyatoh waka Diabetologist wa yoh yei tipmit napoh London, United Kingdom wei da kreh u kam u Senior Resident Doctor ha Safdarjung Hospital, da kreh u leh kam u Medical Specialist Medical Adviser ar snem ha Mumbai.
Neitæ da pynkhreh haroh u wow lai kreh cha baar ka ri India, tangwa heipor wa wan u cha Shillong neibynta i kaam da maad noh u yei jia wa kthang neibhah wa ha kawi ka miet kat dang yieñ yang lok u ha Mawblei kawi ka trok wa kit jhoor da wan syndet ko wei ban ko ya ka kari u hadooh wa da mynsoo joor wei dooh noh u ya ka kjat tidiang.
Uni u Doctor da khana haroh u yei kjut i chitom wa maad u heipor wa ban ka trok oo neibhah wa tip yongbru bait u katwa dang sahkut u hapoh trok wei da pyrkhat u samen wa jan wym im de wei lada im leh jan ymye de u wow leh iyi iyi.
Kamtæ hadien wa chait u neiwa mynsoo wei neidaw wym ye lai de u kylleiñ kylleiñ, da pyrkhat u wow liwan noh cha chnong deiwa sdang yaka thaw e sumaar ha Khliehriat, East Jaiñtia Hills District kawa pyrtuid ka Maia Multispeciality Clinic, wei ha kani ka Clinic da khut ya krehlang u ya ki lok Doctor yong oo kiwa da pyndep yei puræ Specialist waphær waphær kam neibynta ka Gynaecologist, ENT, Ophthalmologist, Physiotherapy wa kiwi.
Hajrong ini i liwan chnong u deiwa sdang ya kani ka Clinic ong u, “I thmu yong nga wym yahaap i weiwa mang u Blai ya nga, yoosar wa kwah u Blai ya nga u em ha chnong neibynta u chakri ya ki bru ka thaaiñ East Jaiñtia Hills katkam i stat wa nga da dep puræ O, tæ takhooh noh O yeini i jia wei dooh O ya ka kjat”.
“Nadooh wa em O hapoh ICU hadooh katni leh jooh pyrkhat O wa toh hi mo kani wa da bynta u Blai ya nga, wei da pynkut O yei pyrkhat deiwa e kti hei mon yong u Blai kat iwa yoo biang u nga,” ong u Dr. Nichwa LS Nongtdu.
Ya kani ka thaw e sumaar yong oo da wan wai paidbah ynnin ka sngi da u Kyrmen Shylla, Montri sorkar uwa man leh u MLA ka thaaiñ hei emlang u DC ka East Jaiñtia Hills, u Abilash Baranwal deilang wa kiwi.
Puræ leh: Da wai ya ka Maia Multispeciality Clinic ha Khliehriat kawa e yei sumaar wa boonjait
