Ka Chaad Sukra 2025 ka Seiñraij Jowai kawa da pynman ynne da chah pynthut ko ha u slap u phria heiwa hei sien nyngkong da pynman ya ka ha Madan Ryngkaw wa em ha Tpep-Pale heithaw ka Mynkoi Pyrdi, Iongpiah deiwa wan sakhi u Symbood Montri Rangbah, u Sniawbhalang Dhar kam u kongsan.
Neiliang u Sniawbhalang da ong u wa sñiawsarong wa da ye u pynkhai im biang ya kani ka Chaad Sukra da kiwa yoo jngai. Wei man ko ka dak wow burom ya ka bei rymaw chwa wow hiar rep hiar riang.
Da ong u leh wa kani ka chaad ka lehkmen man ko ya ka bei rymaw wei da yooluti ha uni u snem u man bha u khoo u kba.
Heijooh i por man ko kam wow yachemlang wow ya tipmit wei wow ya tip leh ya ka riti dustur wei da pynchlur u leh wow pynman da kawi ka Exhibition yow pynyoo ya ka riti ka dustur kiwa em hapoh ka Jaiñtia Hills.
Heipor wa dang pynman ya ka yalang da hiar u slap wa joor wei da haap leh u phria hadooh wym em yoh u pynman iwi leh i chaad ha kani ka thaw wot hadien wa yang boon kynta yow sangeh u slap.
Kamtæ da rai wow ya mih pynman ya i chaad mih yaaw deiwa lai lyngba ka Panaliar, Loomiongkjam, Loompyrdi Iongpiah ter ter hadooh wa poi ha Thawpynchong Dieñkhlam ha Iawmusiang kamwa jooh leh deiwa synraan ki kari wa da pynriam deiwa phooh wa phieñ kiwa tem ya jar jiar ki sur Chaad Sukra wa da pynkhreh wei heini i por leh da hiar biang u slap wa joor.
Manda poi ha ka rynsan wa da pynkhreh ha Iawmusiang da pynman ya ki 15 tylli ki chaad deiwa chimbynta leh da ka Seiñraij Shillong, Seng Khasi Mawsynram, Seiñ Niamtre ki Khynnah Pure Shillong deilang ki dong ki chnat kiwa em ha Jowai heiwa kiwa boon kiwa chimbynta da jhieh ki na khlieh ha sla kjat tangwa chit ka mynsien wow pynyoo ya ki chaad wa kyrpang wa da pynkhreh ki.
Ya ka Chaad Kpær Syntu Pyllah kawa da mut wow pynman ha Madan Ryngkaw hi heipor miet da pynman noh ka ha yungwalieh ka Iongpiah.
Discussion about this post