Ka Meghalaya Editors’ and Publishers’ Association (MEPA) kawa man ka seiñ yong kiwa pathai khubor ha Meghalaya ha i yachemlang wa jhan ynne ka sngi da khyrngiat ko hajrong i pynmih khubor ka seiñ Hynniewtrep National Liberation Council (HNLC) kawa da maham ya kiwa pathai khubor yei wymye ki u pynmih ya ka ki khubor wa khut khang chnong da ka seiñ neipor cheipor.
Chooh chooh wa rap sñiawkhia toh wa ka HNLC da rai ko wow kheiñ ya ki laad pathai khubor kam kiwa choon yong ka du na ini i daw, kamtæ ka MEPA ymye ko wow mutdur wa kam kani ka wyrta khubor u mih ko na ka HNLC.
Hajrong ini ka MEPA ynne ka sngi da rai ko wow kyntu ya ka HNLC wow sñiawthooh ya kiwa pathai khubor wa ymye de ki wow pynmih ya kawon kawon ka rai khut khang chnong da kiwon kiwon kiwon ki seiñ katkam ka hukum ka Meghalaya High Court No. WP (C) No. 127/2015 ha ka 27.05.2015.
Katkam kani ka hukum, ka High Court da klam che ko wow pynngat ha ki kyndon tyngkheiñ hukum (Contempt of Court) ya kiwon kiwon kiwa pathai khubor kiwa pynmih ya ki khubor khang chnong wei ka hukum da phah ko leh ya ka sorkar wow pynngat ha ki kyndon aiñ kiwa khor (Criminal Case) ya ki laad pathai khubor kiwa tyngkheiñ ya kani ka hukum ka High Court.
Neiliang ka MEPA da lai ujor ko wot chadooh ka Supreme Court wow pyndam ya kani ka hukum ka High Court tangwa neiliang ka yung kasari wa khlieh dooh ka ri da rai ko wow pynksan ya i rai ka High Court.
Ki laad pathai khubor ka Meghalaya hadooh ynne ka sngi da yieñ ki hajrong ka yurim wow man pyrdi khlem chah chiliang wei hajrong ka yurim yong kiwa pathai khubor wa laitlooid wei wymtoh u chah banbeiñ heiwon heiwon leh. Ka MEPA da pynsñiaw ko leh wa kiwa pathai khubor u yieñ ki wow chakri ya ki paidbah salonsar wei u man ki kam i sur u paidbah ha ka ri synchaar paidbah.
Hajrong ini neiliang ka MEPA da kyntu ko leh ya ka HNLC wow sñiawthooh yeiwa sakhiat khamtam wa ki laad pathai khubor hap ki wow bood ryntih ya ki kyndon ka aiñ katkam ka hukum ka yung kasari.
