Ynne ka sngi man ko ka sngi wa le wa yakhih ka Joint Action Committee (JAC) wow dawa chna pynmiat ya ki bynta u NH-6 wa da sih chawa palat wei da sakhi wa u sarok uwa jooh boon kari bha ynne da man u uwa thylli.
Hawa yoh u yaklam wa ki kattu katni kiwa yah Truck kamjooh kiwa sahkut ha rood uni u sarokbah da khana ki wa i sih u sarok da pynsih i ya ki kari yong ki wei i khang sarok da pynthut i yei lai i wan ki kamjooh kiwa kit tiar wei uwi uwa sih kari uwa da sahkut kattu la le sngi da ong u wym ye ki Mehchanic wow poi cha ini i thaw wa neh ka Truck u.
Chooh chooh da ong ki wa boonsien ki Truck chimpor ko hadooh 2-4 sngi wow lai du kamwa 20 km uni u sarokbah weiwa boonsien sih ki kari du neidaw wa sih ware u sarok.
Ynne da sakhi leh wa ka NHAI da sdang chna pynmiat ko ya ki bynta u sarok wa da sih heiwa da em ki Truck wa ki pooh chi loom wa da sdang pynhiar moo wei khyndaw wei da pyn madan ki ya kini ki moo i khyndaw.
Hawa yaklam wa u Asst. Waheh Chnong ka Tongseng, u Phulman Rymbai da khana u wa nadooh nachwa, ka JAC da yoo ko wa chem chitom bha ki paidbah nadooh kiwa lai thooh dawai hadooh kiwa kamai kari neidaw wa sih ware uni u sarok kamtæ da pynbor ya ki wow pynman ya ini i yakhih.
Chooh chooh da ong u wa boonsien ki paidbah da chah thok ki ha ka sorkar neipor cheipor wei u yieñ skem ki kam ka JAC u yakhih lada ka sorkar ym ye ko wow chna pynmiat ya uni u sarokbah.
Hawa kylli kammon kwah ka JAC wow chna pynmiat ya u sarok, da ong u wa kamwa man i por kattæ, neiliang ka JAC kwah ko wow yoo wa da siang wei pyndap moo salin donhi chwa ya ki thlu wa heh wa em ha uni u sarok.
Katkam wa man, ynne da em ka yalang hapyrdi ki bor District ka East Jaiñtia, ki sahep ka NHAI waka JAC ha Umkiang, heiwa neiliang ka JAC da yieñ skem ki wa u pteiñ ya i khang sarok sa le sngi kattu wow pyntikna wa i chna pynmiat ya u sarok toh u man i na Tongseng hadooh ha Ratacherra.
Discussion about this post