U Montri wa pait ya ka chnat Bordiñ ka jylla, u James PK Sangma da kyrmen u wa ka takit wa laitlooid daw ye ko u pyndep ya i takit hajrong i kynrum kynram hapoh ka MeECL hapoh i por wa da booh.
Kam wow pynkynmoo heini ka sorkar da thung ko da ka Enquiry Committee wow takit ya i kynrum kynram hapoh ka Meghalaya Energy Corporation Limited (MeECL), tangwa hadooh katni kani ka Committee dang yachem ko dang du chisien nadooh wa da thung ya ka ha u Naiynñiaw yong uni u snem.
Ka sorkar jylla da e por ko ya ka Committee wow pyndep ya i takit hapoh 3 bnai wei wow phah ya ka bui (Report) cha ka sorkar, tangwa kamwa man katni ka takit ympu sdang ko.
Neibynta kani ka Committee ka sorkar da thung ko wow khlieh ya ka da uwa bichaar wa da chong ngiah yong ka Allahabad High Court, u Justice (Retd) RN Mishra wei ki dkhot u kynthup ki ya ki sahep wa da chong ngiah kam u IAS u Manoj Kumar wa u Executive Director wa da chong ngiah ka REC Ltd, u Sunil Kumar.
U James da ong u leh wa ympu tip hadooh katwon kani ka Committee da pyndep ko ya i takit wei boi daw chimpor neibhah wa daw hap pynbiang ya ki kot ki sla wa kiwi kiwa emkaam.
