Kawi ka khynnah kawa dang ar snem tam kawa na chnong Niawkmai, West Jaiñtia Hills da dooh noh ko ya ka kjat tidiang hadien wa bakla e Injection.
Ini da jia i ha ka 10-05-23, hawa kani ka khynnah kawa em kamwa ar snem soo bnai da iñdoh ko, kamtæ ka bei ko da lai yah ko ya ka cha ka Sacred Heart Health Centre, Sahsniang wa pynlai da ki Sister heiwa da e Inject ya ka na skep tidiang rap haneiñ i khlieh kyrsu.
Manda poi ha yung da sdang kylla jngem wei kylla rong yong i bynta wa chah Inject, kamtæ da lai pynyoo biang cha ka Sister wa e yei Injection kawa da ong wym phær ini wei ym emkaam wow lai cha Hospital.
Tangwa neidaw wa da nang joor i kylla rong yong ka kjat, kamtæ ha kani ka jooh ka sngi da lai kit ya kani ka khynnah cha Dr. Norman Hospital, Jowai heiwa heini da ong ki wa ym ye de wow sumaar wei da phah wow lai ki cha Nazareth Hospital Shillong wei manda poi heini da phah won wow lai cha NEIGRIHMS ha kani hi ka jooh ka sngi.
Ha NEIGRIHMS neiliang ki Doctor da ong ki wa hap ah noh ya ka kjat hadien wym ye de u sumaar wei ha ka 13-05-23 da wan leh ki Sister naka Sacred Health Centre Sahsniang kiwa da tyrwa wow lai kit ya kani ka khynnah cha Apollo Hospital Guwahati yow yoh yei sumaar wa biang.
Manda poi ha Apollo Hospital Guwahati leh da ong ki wa hap wow ah noh ya ka kjat neibhah wym ye sumaar de, kamtæ ha ka 20-05-23 da ah noh ya ka kjat nadooh ka khlieh kyrsu wei ha ini waroh i por da emlang bait ki Sister naka Sacred Health Centre kiwa da ong wym toh u sñiawsih wei daw kitkhlieh ki ya ini wei u emlang ki wa ki wei da kular ki leh wow phah skur ya kani ka khynnah wei sumaar leh ya ka kjat katkam wa emkaam.
Kamtæ ha ka 04-06-23 kiwa ha-yung deilang wa u President Rangbah ka Seiñ Kur Shylla Khasi Jaiñtia, u P. Shylla da lai ki wow pynsakhiat ya ini wa da kular ki Sister heiwa ki Sister da kular ki wow phah lai skur wei wow e da ka kjat Artificial Limb ya kani ka khynnah hadooh wa da heh ko.
Hadien wa da dep wow yaklam bha chaphang ini, neiliang kiwa ha-yung waka Seiñ Kur da pynkreh ki da ka sosular wow yasoi tangwa neiliang ki Sister ym bien ki wow soi ka wei da khut yaklam biang ha ka 20-06-23, wei ha kani ka yaklam da emlang ki Phadar wa ki Sister kiwa da kyntait yei kular yong ki heiwa u Phadar Manbha Pakem da klam u da ki kyntien wow beiñ wei da pynbaad u leh ya kiwa ha-yung wa da chim kabu ki ya ini wa jia ya ka khon ki wei da phah u leh ya ki wow e da ka Case.
Neiliang ka yung kamjooh ka kur da sñiawphylla ki wow yoo wei wow sñiaw wa kat da u Phadar da klam u da ki kyntien pynmong ya ka yung ka sem kawa da maad ya ini iwa sñiawsih wei jinjar wei ym e u yei sñiaw hajrong i jia ya ka pli ka khon yong ki kawa da dooh ya ka kjat kawa da man noh kam ka bru wa da duna hei doh i pran waroh chi rta kattu du neidaw wa bakla e Inject donhi.
Ka yung ka sem kamjooh ka Seiñ Kur Shylla Niawkmai da beiñ joor ko ya ini klam pynmong yong u Phadar Manbha Pakem ya ka yung ka sem wa ya u President ha katu ka sngi.
Ya ini da pyntip da kiwa ha-yung wa na ka Seiñ Kur Shylla Niawkmai.
Discussion about this post