Ki seiñbhalang kiwa lai embyntalang ha ka ya yalang yong ka sorkar neibynta wow pynbait ya u pood u ang da pyntip ki wa da dep wow e yumut cha ka sorkar wa hachwa wow chim ya kawon kawon ka rai toh u chim leh ya ka sur yong ki dorbar Hima, ki waheh chnong wa ki tre thaw.
U President ka Khasi Students’ Union (KSU), u Lambokstarwell Marngar da pyntip u wa ka sorkar da pynsñiaw ko wa man ko kawa smat wow ap yei e yumut yong kiwa synchaar chnong, wei da ong wa kam ki seiñbhalang daw pteiñ ki wow booddien neibhah wa da yoh wow ya syllok leh wa kiwa synchaar chnong wei da yoh lum leh ya ki thup yong ki Hima kawa daw phah ki cha ka sorkar ha ki kajiak sngi yow bichaar wa ym dooh ya ki thaw cha ka Assam.
Hawa yatoh wa i e thaw mar kylliang, da ong wa ki seiñbhalang ym em yaklam ya kani ka ‘Give and Take’ Policy, tangwa da yaklam bait hawa yatoh wow pynbait ya u pood u ang katkam ki kot ki sla, ki dulir wa ki khana pateiñ yong ki thaw.
Neiliang u President ka Hynniewtrep National Youth Front (HNYF), u Sadon K Blah da ong u wa i yaklam man bait ko kam i sdang ya ka luti wa ka sorkar da chim ko, wei da pyntip wa ka sorkar da pynsñiaw ko wa daw yachem biang.
U Dundy C Khongsit uwa man u General Secretary ka Federation of Khasi Jaintia and Garo People (FKJGP) da ong u wa ka seiñ da pynsñiaw ko yei suki ka sorkar Meghalaya wow tipmit (Register) ya ki thaw, katwa ka Assam ka smat bha ko, wei da kyntu leh ya ka sorkar wow pait bha hawa yataoh wa katai ka bynta.
Ha i jooh i por da pynsñiaw yei sñiawlyngngoh yei man arsap yong ka sorkar Assam neibhah ka ong ko wa toh u pdiang bait ya ki kaam pynroi na waroh ar jylla, wei ka Assam ka wanrah bait ko ya ki kaam pynroi ha ki thaaiñ yong ka West Khasi Hills, katwa manda leh ka sorkar Meghalaya ya ki kaam pynroi ha khappood, ka sorkar Assam ka pyrchah ko.
