U Symbood Montri Rangbah ka jylla uwa pait leh ya ka chnat Kaam Pohyung (Pulit), u Prestone Tynsong da ong u wa i yaklam yasuk wa ka seiñ Hynniewtrep National Liberation Council daw ktah lada em sakhiat i saam chithi dawa poisa. Tangwa da pynrap u wa ha kani ka juk wa katni suk bha wow chna chithi thok wow dawa poisa.
Da khana u wa i yachem wa kiwa yahkhmat ka HNLC kiwa da wan wow sdang yaklam yasuk dang ini wa dep da lai ko chakhmat wei da kyntu u ya ki wow leh iyi iyi ya kiwa pynemkaam bakla ya ka Letter Head khlem da tip ka HNLC.
Heijooh i por, u Montri da ong u wa ki pulit da leh ki yeiwa emkaam yow chem ya kiwa emkti wei yei thmu yong kini ki bru wow sdang pynthut yei klam yasuk. Da ong chooh chooh u wa kamwa man katni, ka seiñ HNLC da chimkhia bha ko yei yaklam yasuk wa ka sorkar kawa da sdang wow lai chakhmat.
Hawa yatoh wa i pdiang yong ka HNLC lada em kiwa e yarap cha ka seiñ, u Prestone u da ong u wa ya katni wa da lai i yaklam, waroh toh wow sangeh chwa, wei kyntu u ya ka HNLC wow rap chimkhia chooh chooh wei ka sorkar leh dang yang ko ya ki mat wa ka HNLC kwah ko wow wanrah ha i yaklam yasuk.
Kam wow kdaw heini wa da mih khubor ha kini ki sngi wa dep wa em ki bru wa da yoh ya ka chithi dawa poisa na ka HNLC kiwa man kam ki bru heh spah ha Khasi wa Jaiñtia Hills heiwa ka HNLC da kyntait ko wa da leh ko yeini wei da maham ko leh ya kitu kiwa chim kabu kamjooh wow pynthut yei yaklam yasuk.
Tangwa ka seiñ won da ong ko wa pdiang ko yei e sñiawbha ki bru cha ka seiñ.
Discussion about this post