Shillong: Ka sorkar India lyngba ka Ministry of Home Affairs (MHA) da phah ko lyngba ka Prime Minister’s Office (PMO) wow pynche ka Khasi Hills Autonomous District Council (KHADC) hajrong i e Trading Licence cha ki baar jylla kiwa khayi da ka Council.
Hajrong iwa kylli u MDC ka Mawphlang, u Lamphrang Blah, u Executive Member wa pait yei khayi pateiñ ka KHADC, u Paul Lyngdoh da ong u wa i paan pynche na ka MHA toh hadien wa em ki kattu katni ngut ki baar jylla wa ujor pyrchah ya ka chnat cha ka ka yung krehkaam u montri rangbahdooh ka ri hajrong kani ka bynta kiwa da pynbaad wa da chah leh embor ki.
Da ong u leh wa ya ka chithi na ka sorkar India da phah chwa cha ka North Eastern Council (NEC) kawa da phah won cha ka sorkar jylla wei na ka sorkar da phah cha ka KHADC wow pynche.
“Ka sorkar jylla daw pynche ko cha ka MHA yei jubab yeiwa daw phah won cha ka PMO,” da ong u.
Hajrong i pynbaad wa yatoh kani ka phang wei ya pynyoo bor, neiliang u Paul da kylli u wa iyi thmu kini ki bru wow rah ya kani ka phang chadooh cha MHA wa PMO.
Da ong u leh wa ka ujor kini ki bru da kam ki wa ka Council toh u leh ko kamwa jooh hawa e Licence, tangwa katni emkaam u yohbor na ki bor chnong ka wym krehkaam khamtam ya ki baar jylla katkam ka aiñ. Wot hadien wa da chah pyndooh bor ki Rangbah Shnong, ka KHADC dang nood ko wow pynbor ya kiwa khayi ki baar jylla wow paan NOC neibynta wow pynthymme ya ki Licence.
U Paul da ong u leh wa i leh kini ki baar jylla da mih i kylli yei bor e Trading Licence.
“Wow pynskem ya ka Trading Licence ymtoh hei bor ka bor yong nga samen, tangwa da pynkup da ka aiñ Trading by Non Tribal Act, Section 3 (a) kawa ong wa emkaam wow yohbor na ki Rangbah Shnong hadien wa da yoh mynjur na ka dorbar,” da ong u.
Da ong u leh wa kini ki bru wa ujor man i iwa sñiawsih wow tip wa kam ki wa da toh u dooh u dam noh ka KHADC nadooh wa yoh ya ka jylla iwa da pynthut yei khayi pateiñ ki baar jylla.
U Paul da ong u leh wa lada ka sorkar jylla leh embor ko lyngba ka Land Transfer Act, kamjooh ka District Council da em ki aiñ wow yada na ki baar ri lyngba ka Trading by Non Tribal Act.
Hajrong i phah pynsakhiat ya kiwa dai madan kiwa man leh ki Khasi, u Paul da ong u wa i hok kawi ka dhab ymtoh u pyndooh ko yei hok kiwi tawon neibhah waroh em ki ya hok yong ki hi nadooh ki paidbah wa lai wa wan, kiwa yah kari wa kiwi kiwi.
U Paul da ong u leh wa nadooh wa sdang ya ka Council hadooh katni em du 5 tylli kiwa da yoh ya ka Trading Licence wow chong dai madan nadooh u snem 2011 hadooh 2015 iwa pynyoo wa kiwi khayi tooh donhi ki.
Discussion about this post