U Dr. Vijay Noel Nongpiur, Nodal Officer ka NEIGRIHMS da pyntip u wa haka 30-05-20 ki chi kurim da wan ki na Delhi wei katkam ki kyndon wa da booh daka sorkar jylla da leh yaki daka Rapid Antibody waka RT-PCR Test. Ya u kurim da booh ha MATI Quarantine Centre katwa yaka kurim u kawa punkhon da leh Quarantine ko ha yung.
Hadien 48 kynta wa leh yaka Test da chem lyngba ka Rapid Antibody waka RT-PCR toh kiwa man Negative namo kiwa ym em chah ktah ha u COVID-19, kamtæ ya u kurim da pynlait ya oo na MATI Quarantine Center wei da booh ya oo ha yung yow leh Quarantine.
Haka 6 tarik uni u bnai, uni u kurim da sdang u wow yoh ki dak ki chin wa kdaw wa ye u wow yoh COVID-19 wei da lai u cha Civil Hospital, Shillong wei da phah leh biang yaka RT-PCR Test ha NEIGRIHMS wei da ksoh noh ya oo ha Civil Hospital, Shillong.
Haka 9 tarik uni u bnai, ka kurim u da sooh khon ko wei nyngkong da leh yaka COVID Screening wei neidaw wa da dep Test chwa yaka deilang wa u kurim ko wei da chem wa ym em chah yoh ki ya u COVID-19, kamtæ da phah yaka cha i thaw wow booh ya kiwa punkhon.
Hadien ini, u State Nodal Officer da pyntip u cha u Nodal Officer ka NEIGRIHMS wa u kurim ko da yoh u ya u COVID-19 hadien wa Test biang ya oo haka sien wa ar. Deiwa tip ya ini, yaka kurim uni wa yoh da rah noh yaka cha i thaw wa booh kyrpang wei da leh wut wut biang yaka PCR Test wei da chem wa kani leh em ko ya u COVID-19.
Kamtæ da khang noh yaka Casualty waka Labour Room kani ka thaw sumaar chi por wei da pyntip leh cha u DHS (MI) wei da pynkhooid leh ya kini ki thaw.
Hapoh kani ka thaw sumaar da leh ya i boodien ya kiwa yachem wa yajan wa kani ka bru wei da e pyntip leh cha u State Nodal Officer yow leh u ya iwa emkaam.
Kam ka khubor wa da yoh, ya u kurim kani ka bru da pynbna lang wa yoh COVID-19 u ynnin ka sngi heiwa da em 3 ngut kiwa yoh kiwa wan na Delhi wa Chennai.
Katwa yaka kurim u da pynbna ynne ka sngi kam kawa yoh COVID-19 kawa yachem wa yajan wa uwa yoh COVID-19 ha Shillong.
