Ka Dorbar Chnong Them Mawbah ryngkat wa u MLA ka West Shillong da klam che ki wa ka sorkar ymtoh u booh ko ya ki Harijan ha kani ka chnong, heiwa ynne sngi da lai yachem ki ya u Symbod Montri Rangbah uwa man leh u Chairman ka High Level Committee wow kyrriah ya kini ki bru na Them Iewmawlong.
U secretary ka chnong Them Mawbah, u Eris Thabah da ong u wa i pyrchah ka chnong toh wa khynñia ware kani ka thaw, khamtam wa ki Khasi ym em tang 500 ngut kiwa chong chnong na ki 14,000 ngut.
Da ong u wa waroh tip bha ki wa ki Harijan na Themmetor toh ki bru kiwa kammon, wei kam kiwa kitkaam chnong ym kwah ki wa ka Mawbah u man ko ka chnong wa wanrah ya i sih, da pynrap chooh chooh u wa mynstep hadien habood daw hap lai chim Certificate Chnong na ki Harijan wei yeini ka chnong hap pait jngai ko.
Neiliang u MLA ka West Shillong, u Mohendro Rapsang da ong u wa u em bait u wa ki paidbah wa ka chnong deiwa pynrap wa kani ka thaw da man ko kawa da khynñia chwa wei wow wanrah sa 342 tylli ki manyung da pynkhynñia chooh ya ka.
Da ong u wa neiliang ka sorkar da chimkhia ko ya ini i pynsñiaw ka Dorbar Shnong wei u Symbood Montri Rangbah da kular u wow bichaar biang ya ini i thmu wei daw pyntip ya i rai wa daw chim hadien.
