Hadien wa pyrchah kiwa boon yei seiñ ya ka All Arunachal Pradesh Tribal Muslim Youths’ Forum, neiliang kiwa yahkhmat kani ka Forum ha kani ka tayaaw ym yohsa ki wow pyndam noh ka.
Nadooh wa bna wa em wa sdang ya kani ka seiñ ki jaitbru ri-loom wa man kam ki Muslim ha jylla Arunachal Pradesh, ki dkhot kani ka seiñ da chah beiñ wei chah maham ki.
U Chairman kani ka seiñ, u Giah Limpeah ha ka 8 tarik da pynbna u wa da rai ki wow pyndam noh ya kani ka seiñ neidaw wa joor pyrchah kiwa chong chnong ka jylla.
Da ong u wa burom ki yei sñiaw ki para Arunachali kiwa da wit yei em kam kani ka seiñ hanla da sdang ya ka neibynta i bha i miat ki jaitbru ri-loom kiwa bood ya ka niam Islam. Wei ki paidbah da sñiawthooh bakla ki wa daw kyrchaan ki ya wym em man kam ki ST ka Arunachal kiwa man kam ki Muslims hadooh wow kyrchaan ya ki Muslim kiwa na Bangladesh kiwa psiah pyrchah ya ka aiñ.
U Limpeah da kyntu u leh ya ki paidbah wow sangeh noh yei maham ya ki dkhot ka Forum neibhah ka niam man ko ka mon laitlooid ya kiwon kiwon wow jied ki kamwa kiwi jied ki ya ki niam yong ki hi.
Da ong u leh wa u papun u toh uwa man kam u heh niam Donyi Polo kiwa man kam ki niamtre ka Arunachal wei heipor wa dang khynnah u jooh lai yaseiñ u tangwa da chem u yei suk ha ka Islam kamtæ da kylla niam noh u tangwa ong u wa oo toh u Nyishi u jaitbru ri-loom wei ym leh u iyi iyi pyrchah ya ki.
U Limpeah toh uwa na Tali, Kra Daadi District, wei da psiah u cha ka niam Islam nadooh u snem 2012 wei da im u kam u Muslim.
Da kam u leh wa da em ki bru kiwa da pynpoor yei mynsien wow choon ya kiwa bood ya ka niam Islam ha Arunachal tangwa ki kam ki Muslim ym em tyngkheiñ ki ya kawon kawon ka aiñ wei da leh ki yeini dei mon laitlooid yong ki.
Discussion about this post