U FASTag uwa da sdang pyrchang pynkrehkaam nyngkong ka sorkar nadooh u snem 2014 ha u sarok na Ahmedabad-Mumbai yow su yaka bai lai, bai wan lyngba ki Toll Plaza da ka Digital Payment deiwa dam noh wow pynemkaam daka poisa heiwa da pyrchang leh ha kiwi ki sarok hapoh ka ri. Kamtæ ha u Naichiphaw 2019 da pynbna wa ya u FASTag u pynkrehkaam noh ha waroh ki sarok National Highway wa em hapoh ka ri deiwa pyndait ya oo ha waroh ki kari.
Hadien ini, neiliang ka sorkar pyrdi da e por ko yaki paidbah wow pyndait ya u FASTag heiwa nyngkong da rai wa nadooh ka sngi nyngkong uni u snem ym hoi de u dam u pynemkaam ya u FASTag iwa da e por biang hadooh ka 15 tarik uni u bnai wow pynbiang ya u FASTag.
Yaki kari wa em hapoh ki ‘M’ wa ‘N’ Category kiwa man ki kari soo chaka kiwa kit bru wa kiwa kit bru deilang wa ki mar, lada ym em ki ya u FASTag daw haap toh kuna ki kawa man ar chah yei dor wa da booh.
Kamtæ ynne i step haka Toll Gate wa em ha 7 Mer Pasyih, da leh ya ini heiwa ki kari wa em FASTag da toh ki T. 30 hawa lai wa T. 10 hawa liwan ki hapoh 24 kynta (nadooh wa lai).
Neidaw won wa kiwa boon ki kari kamai wa em cha Ri-Loom Jaiñtia hadooh ki kari ki bru samen toh kiwa ym em booh ya u FASTag, kamtæ da hap ki wow su ar chah kam ka kuna iwa T. 60 hawa lai kamjooh T. 60 hawa wan, wei ini da wanrah i yei pyrchah naki paidbah kiwa ym sñiawthooh neiyi i daw wa da hap su ki T. 60 heiwa kiwa boon wa sñiawthooh wa chah chim kabu ki heiwa da pynku yaka bai Toll cha ka T.60 na ka T.30 iwa man i dor warim.
Chooh chooh kiwa kreh ha ka Toll Gate da pynche ki wa neibynta ki kari ki bru samen ye ki wow yoh yaka Monthly Pass FASTag kawa T. 275 chi bnai.
Ini waroh da wanrah i yei sahkut kari wa joor bha nadooh i step hadooh kamwa 1 waje i sngi neidaw wa em ki paidbah ki wym bien ki u su ya ka kuna. Heiwa da em leh kiwa da lai na luti khloo yow lait u psiah lyngba ka Toll Gate wei ki khynnah skur kiwa da sahkut da liwan biang ki cha yung.
Hadien won wa sahkut da slem por, da sdang yalang ki paidbah wei da em leh ki seiñbhalang wa wan, heiwa da dawa noh wow pynlait chwa wow lai ki mynkna waroh ki kari katwa ym pu ye wow pynbait ya ini i kaam heiwa da sdang i sahkut kari wow wiar wer pa wer.
Da wan leh ki sahep na ki bor district wa kynthup nadooh u SP waki Magistrate ka West Jaiñtia Hills yow pynbait ya ini i kaam heiwa yaka rai ym pu em ye wow chim hadooh wa pynmih yaka khubor.
Iwa ood ki paidbah toh wa em kiwa lai du 10 Meter naka Toll Gate leh haap wot ki wow su ya ka bai psiah lyngba ki Toll Gate. Heiyatoh wa kam kini ki bru wa sah chajan ki Toll Plaza ye hi wow paan bor yow pynlait yaki nei su bai lai deiwa pynsakhiat waka NHAI yei thaw sah ki deiwa rah yaki kot ki sla wa biang wow pynsakhiat yeini.
